توبة ملحد لا ديني بسبب لص !!!..

بقلم أبو حب الله ...
----
1))

> (سامية) .. أنا حاسس بصداع شديد ...
"" ..........
> (سامية) ؟.. إنتي معايا ؟... إنتي سمعتيني ؟...
"" أيوه يا (عماد) سمعتك ... طب عايز إيه مني ؟.. 
لو عايز توقف العربيه وترتاح شويه مفيش مشكلة ...
> لا إنتي مفهمتنيش .. إنتي مش دكتورة يا بنتي ؟.. هل معاك دوا ولا حاجه ؟
"" أما نوصل البيت إن شاء الله ...
> إنتي لسه زعلانه مني ؟...
"" لا أبدا ً!!!!..
> شكلك لسه زعلانة ؟...
"" هو انت عملت أو قلت حاجه تزعل ؟.. بسيطة جدا ...
انت قررت تنزل مصر بعد 15 سنة في الغربة علشان تقضي معانا إجازة الصيف أخيرا ًفيها ولو مرة :
وأنا طلبت منك تننزل الأول عند بيت والدي وأخويا : لكن إنت شايف إن إحنا ننزل على الشاليه بتاع 
عيلتك الأول !!!.. وبعد أسبوعين تبقى تيجي معايا نزور أخويا ... عادي .. ده رأيك وأنا بحترمه ...!
> لا .. شكلك لسه زعلانه يا (سامية) .. طب مش أنا بخليكي تنزلي كل سنة إنتي و(رانيا) تزوريهم ؟
"" يا (عماد) إنت مش حاسس بالمستوى اللي انت وصلته ؟؟؟
إنت ماشفتش أهلي بقالك 15 سنة ؟!!؟؟ رغم إنك نزلت مؤتمرات لمصر في الـ 15 سنة دول أكتر
من 10 مرات .. لكن ما فيش ولا مره واحده فكرت حتى تفوت عليهم ولا على الأقل تتصل بيهم !
دا حتى أختي (سهام) ما زرتهاش معايا إلا مره واحده بعد جوازنا و(رامي) ما يعرفهاش إلا من الصور !
سيبك منك إنت .. لأني خلاص رميت طوبتك من سنين ..
إنما (رامي) .. (رامي) الي بقى مرتبط بيك وبقاله 5 سنين ما بقاش عايز ينزل معايا مصر هو كمان ؟!..
مش كفايه إنك بوظت دماغه بأفكارك المسمومة وكتبك دي ؟.. أستغفر الله العظيم .. أنا بس مش
عايزه اتكلم وانت سايق ...
> طب بس بس .. اهدي شويه يا (ساميه) اهدي .. فيه إيه ..؟ بقالك كده كذه شهر مش ولا بد
معايا ؟.. حتى بقيتي تشتكي إنك مش مركزه في شغل المستشفى .. في إيه ؟..
"" هاقولك أنا يا (عماد) فيه إيه .. وكويس إن الأولاد في البيت ومش معانا ..
أنا خلاص زهقت .. مش عارفه أعمل إيه ؟.. تخيل إن فيه شيخ قاللي إني المفروض أبعد عنك ...
كل الوصف اللي وصفتهوله عنك : بيقولي إنك كافر والعياذ بالله !!!..
كتبك مليانه بالشك في وجود الله !!.. زائد استخفاف بالنبي عليه الصلاة والسلام بكلام : أنا عارفه
إنك بتنقله من الغرب وأوروبا وشوية ناس ضايعين وتايهين زيك من مصر ولبنان و ....
> ضايعين وتايهين ؟..! لو سمحتي يا (ساميه) بلاش غلط .. اتكلمي معايا بس بلاش غلط ..
"" أنا والله اللي ما بقتش عارفه الصح من الغلط !!!.. اهيء اهيء اهيء - بكاء  - ..
> طب بس ما تعيطيش ؟؟ إحنا قربنا نوصل أهوه ...
"" يا (عماد) إنت اتغيرت 180 درجة خلاص .. أنا حاسه فعلا إني عايشه مع إنسان تاني غير اللي
أنا اتجوزته من 20 سنة !!!.. أنا حاسه فعلا إن حياتي معاك حرام زي ما سألت أكتر من شيخ !!!
لا صلاة ولا صوم ولا حتى كلمة صح عن الله والإسلام والنبي !!!.. أنا اللي فعلا كنت عاميه عن
كل ده السنين اللي فاتت .. آه أنا باعترف إني كانت الفلوس وضمان مستقبل أولادي كانوا مش
مخليني انتبه لبوظانك يوم عن يوم ... بس أنا والله عارفه ربنا وبحبه .. ومش عندي استعداد إني
استمر معاك بعد كده ......
> يوووووووووووووه ... رجعنا للاسطوانة دي تاني ..... أرجوك يا (ساميه) اسكتي دلوقتي ...
"" طب سيبنا منك إنت .. لأني فعلا ًاحتمال كبير جدا زي ما قولتلك : ما رجعش معاك انجلترا
تاني .. بس (رامي) ابنك .. ليه عايزه يضيع زيك هو كمان ؟.. وما تقوليش إنك مش ضايع ؟!!
إنت ممكن تضحك على الناس كلها في كتبك زي ما انت عايز .. إنما أنا الوحيده اللي عارفه إنك
من جواك ضايع .. ضايع وتايه كمان والله العظيم ...
> يا (ساميه) : (رامي) دلوقتي عنده 15 سنة .. يعني يعرف يفرق بين الصح والغلط ويعرف يختار !
ولو شوفتيني جبرته على حاجه : أو دفعته لحاجه معينة : ابقي لوميني يا سيتي ساعتها ...
"" وهل بداية شربه للسجاير والخمر زيك : ما لوش دعوه برضه بيك ؟؟؟...
مشكلتك يا (عماد) إنك ............
> خلاص وصلنا ... أرجوك أجلي الكلام ده لبعدين عشان الولاد .. خليه لبليل .. وما تنسيش
تبصي على الشنط عشان مش عايزين نتأخر بكره الصبح عن معاد الطيارة ..
"" قال يعني انا بشوفك أصلا صبح ولا ليل ..! بس أحسن .. والحمد لله إني هارجع لأهلي عشان
أعرف أفكر كويس وآخد قراري ...
----
2))

# ما تيجي تلأبي مأاانا دور كوتشينا يا (رانيا) ؟
^ لا شكرا .. أنا ورايا مسؤليات ومش زيك يا ساعدت البيه ...
# البــ .. البيـــ .. بيــــه ؟؟!.. وات إذ زيز ( بيه ) (إيماد) ؟!...
> البيه دي يا (رامي) يعني حاجه كده زي .. زي مِستر أو جنتلمان تقريبا ...
# امممممم .. ثانك يو (إيماد) ...
> ما تيجي تلعبي معانا يا (رانيا) شوية كوتشينه وتسيبك من الكتاب ده ...
دي آخر ليله هنا في انجلترا وبكره نكون في مصر !!.. وروحي نادي لمامتك كمان .. أنتو مش
كنتو دايما تقولوا إني مش بقعد معاكو خالص .. أديني خلّصت سلام على اصحابي وبقيت فاضي
أهوه ... انتو اللي فين بقه ؟؟؟..
^ والله يا دادي الكتاب اللي معايا ده مهم جدا .. أهم من الكوتشينه دي خالص .. أول مره 
أعرف إن فيه كتاب حلو كده عن أحاديث النبي .. اسمه (رياض الصالحين) .. 
> (رياض الصالحين) ؟!.. إيه اللي جاب الكتاب ده عندك ؟!..
طب وعارفه يا (رانيا) اسم المؤلف بتاعه ده إيه ؟؟.. 
^ أولا ًهو مش مؤلفه .. هو جامع لأشهر أحاديث النبي تقريبا وأصحها .. اللهم إلا بعض الشرح
البسيط على الأحاديث والكلمات الصعبة .. وده كويس جدا لأني بقرا النسخة العربي والإنجليزي 
مع بعض واللي مامي جابتهوملي من أسبوع وقربت أخلصه .. والكاتب اسمه الإمام (النووي) ..
> ههههههه ... طب وما لاحظتيش حاجه غريبه في اسمه ؟؟.. يعني حتى اسمه (النووي) !! يعني
تفجير تفجير حتى الموت هههههه ...
# ييس (إيماد) هههههه هتى الموت ..... هههههه ..
^ سبحان الله عليك يا دادي !!.. حتى اسم العالم الجليل ده هاتتاريق عليه ؟؟؟.. لا يا سيدي ..
كلامك - وكالعادة - مش صح !.. وهاتتحرج جدا لو قلته قدام أي حد مسلم عارف وفاهم ..!
أولا هو من علماء السلف : ومات من قرون طويله !!.. يعني قبل حتى ما يخترعوا القنبلة النووية !
# هقيقي يا (رانيا) داي قبل القنبله النواويه ؟؟؟
^ اسكت انت يا (رامي) وانت عامل زي الاطرش في الزفه كده ....
# أطرا ش ؟؟.. زا فا ؟؟.. وات زيز مينينج (إيماد) ؟...
^ وأما تاني حاجه يا دادي : فهي إن اسمه يحي بن شرف !!.. وأما (النووي) ده : فمنسوب لبلده 
في سوريا : وكان اسمها (نوى) !!!..
> أنا اللي غلطان ..
أنا عارف إن انتي طالعه ليور مامي .. وإن انتوا الاتنين ما بقيتوش تتقبلوا مني أي كلام ..! خليك
معايا انت يا (رامي) وسبهم في حالهم .. أنا هاعلمك لعبه جديده المره دي .. مستعد ؟
# ييس .. أي آم ريدي (إيماد) ..
^ وعلى فكره يا دادي ... مامي جوه في الأوضه بتتكلم في الموبايل بقالها أكتر من ساعه وقافله
على نفسها .. يعني هيا كمان مش فاضيه للعب الكوتشينه والحاجات دي ... ومعاها حق ..
يعني سنين وشهور وانت مش بتقعد معانا ؟!.. وجي دلوقتي عشان سهران ومش جايلك نوم عايزنا
نلعب معاك كوتشينه ؟!!..
غريبه يا دادي .....
----
3))

> خلاص بقى فكيها يا (ساميه) .. المفروض إن إحنا نفرفش بقى مع بعض والأولاد في الأسبوعين 
دول !.. يا سيتي خليهم أسبوع واحد .. بس أرجوكي ما تعكنينيش علي والأولاد بقه ودي أول مره 
نيجي في الشاليه ده تاني من بعد جوازنا !!.. فاكره يا (ساميه) ؟!!..
ياااااااه .. زي ما يكون ده كان امبارح !!.. حتى الفرش الجديد اللي العيله جابوه في الشاليه : ما
يفرقش كتير عن الفرش اللي كان فيه أيام جوازنا ... كل حاجه في نفس المكان ما تغيرتش !!!..
سبحان اللـــــ .. احمممم .. أقصد حاجه ملفته للنظر صح ؟...! 
"" إهيء إهيء - بكاء تاني  - ..
يا أخي حرام عليك .. دانا حتى مكسوفه اتصل بأخويا (صلاح) وأقوله إن إنت جيت معايا مصر !
يعني حتى ما نزلش على بيت بابا أول ما اجي ...
> بصي بقه يا (ساميه) .. أنا خلاص زهقت من القصة دي .. خلاص .. جينا هنا وانتهى الأمر ...
عايزه تندمجي معانا ومع الوضع ده مرحبا .. مش عايزه خلاص .. انعزلي بقى انتي زي ما انتي عايزه :
حتى لو هاتخدي (رانيا) معاكي .. أنا و(رامي) بقى مش هانضيع لحظة إلا أما نستمتع بيها في أول
ليله دي .. سلام ...
---- 
4))

"" (عماد) .. (عماد) .. اصحى .. (عماد) ...!
> خخخخ 
"" يادي المصيبة !!.. أوعى تكون شربت بالليل ؟!!.. (عماد) .. اصحى .. يا (عماد) ...
> هه !!.. في إيه ؟!!.. 
"" هوسسسسسسس .. إنت سامع الصوت ده تحت ؟!!..
> هه ؟!!.. صوت إيه ؟!!..
طق طق طق - نقر على باب غرفة النوم - 
^ مامي .. إنتي صاحيه ؟؟..
"" أيوه يا (رانيا) خشي ...
^ إنتي سامعه الصوت اللي تحت في الصاله ده ؟!!..
"" يا راجل قوم كسفتنا قصاد البنت .. قوم شوف فيه إيه تحت ؟..
> هاكسفك في إيه ؟.. إنتي بتنامي على سرير وأنا بنام على سرير بقالنا شهور ؟!!!..
روحي يا (رانيا) على أوضتك وما تبقيش موسوسة زي مامتك .. ده أكيد صوت شجر ولا أي حاجه !
^ يا دادي !!.. هو أنت سمعته الأول عشان تحكم عليه ؟!!!..
> والله يا بنتي أنا سمعي تقيل بالليل ووداني مش ودان قطط زيك إنتي ومامتك .. خلوني أنام بقى 
عشان أنا تعبان ..!
^ ده ما فيش فايده فيه يا مامي .. أنا هالبس الحجاب وهانزل أشوف فيه إيه براحه ..
> الحجاب !!!.. والله إنتي ومامتك مناخوليا !!!.. يعني لو فيه حرامي فعلا ًهاتنزليله بالحجاب ؟!!
"" لا يا (رانيا) .. تعالي هنا .. إنتي اتجننتي ؟!!.. افرضي طلع حرامي فعلا ولا حاجه ؟!!!..
^ يا مامي ما تخافيش عليا .. أنا عندي مخ برضه .. ثم أنا داخله على 19 سنه .. يعني أعرف اتصرف
كويس وعندي شوية ذكاء ...
"" (رانيا) .. (رانيا) .. آه يا مخبولة انتي ... البت مشيت !!
يا (عماد) .. (عماد) ..!
قوم يا (عماد) شوف البت بنتك اللي نزلت تحت لوحدها دي ؟!!.. قوم يا راجل !!.. إنت مش راجل 
البيت ؟!!!..
> لا .. أنا مش راجل البيت ..! ارتحتي بقا ؟!!.. يا سيتي أنا مش ممكن أبدا هاضيع النوم من عيني عشان 
شوية الخزعبلات بتاعتك إنتي وبنتك دي !!.. أقولك على حاجه .. روحي صحي (رامي) .. أهو ده بقى : 
راجل البيت الحقيقي .. 
"" أه يا حوستي ياني !!.. والله لا أنت ولا هوه بقى فيكو ريحة الرجوله .. وما شابه أباه فما ظلم !.. الواد
نايم هو كمان زي الجاموسة !!!.. لا سمع صوت ولا نيله !!.. أعمل إيه بس دلوقتي يا ربي ؟!!..
أنا مش عارفه أنتو عملتو إيه إمبارح بالليل ؟؟.. هاروح أحاول تاني معاه وأمري إلى الله ...

بوم كيش كراك تيك طاااخ : ماميــــــــــــــــــــــــــــــي !
< صوت جامد لضرب وحاجات اتكسرت : وبعديه صريخ من رانيا لأمها >

وعلى الفور قفز (عماد) من فراشه وكان هو والأم في ثوان في الدور الأرضي من الشاليه : ثم أتبعهم (رامي)
---- 
5))

"" (رانيا) !.. بنتي ..!
> إنت َمين ؟!!..
# زيز إيز شورلي ثيف (إيماد) !!.. يو دونت سي هيز ماسك ؟!!..
"" (رانيا) .. (رانيا) .. قتلتها يا مجرم يا كلب يا حقير ؟..! (رانيا) ... 
- ابعد الست دي عني لأقتلهالك هيا كمان .. أنا معايا مسدس كاتم صوت ومش عايز استخدمه ..
> قتلت بنتي يا جبااان ؟.. (رانيا) !!..
- أنا ما قتلتهاش .. هيا اللي كانت عايزه تضربني : وأنا دافعت عن نفسي فاتخبطت وأغم عليها ..
"" وكمان بتقول دافعت عن نفسك يا جبااان !!.. هو إنت صاحب البيت يا حراااامي ولا احنا ؟!!!..
أنا هاوديك في داهيه .. والله مش هاسيبك ... امسكه يا (عماد) .. اضربه يا (رامي) ...
> هه ....؟!
# وات ؟!!..
- يا أستاذ : والله لو حد قرب مني أنا ممكن أضغط ع الزناد .. حوش الست دي بعيد عني أنا مش
عايز اعمل جريمه !... أنا جاي أسرق بس ... ابعدوا عني لآخر الحيطه أنا بحذركم ..
> اهدي يا (ساميه) بس خلينا نتصرف بعقل ...
"" وكمان دم !!.. فتحت راس (رانيا) الله يفتح راسك .. والله ما أنا سايباك .....

فزززززت - شدت القناع عن وجه اللص : ثم دفعها لتقع على الأرض بقوة - !

"" آآآآه .. يا راجل دافع عني !!.. إنته مش شايفه بيزقني إزاي ؟!!.. 
# هِي هاز أ جَن مامي !!.. 
> أهو (رامي) جابهالك على بلاطه يا ست الدكتوره !!.. 
---- 
6))

- آآه ..! كده غلط بقى .. ليه كده يا ست انتي اللي عملتيه ده ...؟!!
والله لو ما كنتي شديتي القناع كنت هاخد أي حاجه من الشاليه وهامشي .. بس دلوقتي بقا الأمر اختلف !
انتو شوفتوا وشي .. ولازم اتخلص منكو ...
> استنه .. استنه يا مجنون انت .. تتخلص مننا إيه بس .. استهدا بالله .. استهدا بالله ..
"" الله ؟!!.. انت بتقول ايه يا (عماد) ؟!!..
- على فكره يا أستاذ : أنا مش مؤمن بالله بتاعكوا ده ... وعشان كده : ما فيش أي مانع عندي إني أقتلكوا
دلوقتي .. 
> يا بني استنى بس .. استنى أرجوك .. أنا عايز أتكلم معاك .. سيبني بس أتكلم معاك .. 5 دقايق بس ..
5 دقايق وبعدها اعمل اللي انت عايزه ...
- صدقني يا أستاذ إنت بتنفخ في إربه مقطوعه .. أنا ملحد بقالي 3 سنين .. ومستحيل أغير رأيي دلوقتي ..
> ومين بس قالك إني عايزك تغير رأيك .. أنا هاكلمك حتى في إلحادك .. هو يعني الملحد ده معندوش أي
مباديء أو قيم ؟!!..
- لا !!.. أنا وانت وهي وهو شوية ذرات اتجمعت صدفه من مليارات السنين .. واتطورنا لحد ما بقينا كده !
> لا .. أنا أقصد يعني : إن حته الحيوانات عندها عواطف .. صح ولا لأ ؟؟.. عندها تضحية وإيثار ورحمه 
وعطف .. يبقى أنت كمان لازم يكون عندك زيهم : حتى لو بتقول على نفسك ذرات .. لأنهم هما كمان ذرات !
- ما تدخلنيش في متاهه .. تعالوا هنا جنب بعض لو سمحت .. 
> استنى بس استنى !!.. إنت إيدك واكلاك على المسدس كده ليه !!.. يا بني إنت شكلك ابن ناس : ليه تعيش
كده وتودي نفسك في داهيه ؟..
- ما هو أنا لو قتلتكوا مش هاروح في داهيه !!..
> الله يسامحك يا (ساميه) .. إنت كان لازم يعني إيدك تطول وتشد القناع .. ما الشاب كان حرامي محترم !
ليه بس بتدفعيه للإجرام والقتل ليه ؟.. 
بص يا ابني ....
أنا حاسس بيك .. وعارف كل اللي جواك .. طبعا ًإنت حاسس إن الدنيا دي كلها ضدك ..
- لا !!!..
> اصبر بس .. أنا أقصد إنك حاسس إن وجودك ما لهوش معنى .. وإن حياتك زي موتك : مش فرقا كتير ..
صح ؟
- لا !!!.. بالنسبة لي أنا فارقه طبعا ً!!.. أنا عايز أعيش على قد أما أقدر من عمري وأنا مستمتع على قد ما
أقدر ... وإنتو دلوقتي العقبه قدامي ..
> يا ابني نوعدك والله العظيم تلاته ما حد فينا هايقول عنك أي حاجه !!.. هو إحنا نعرفك أصلا ً!!!..
- يكفي إنكو شوفتوني .. يعني ممكن توصفوني وتترسم ليا صورة في البوليس وأضيع أنا بعدها !!!.. وخصوصا ً
إن شكلي مميز بالدقن دي أنا عارف ..
> لا صدقني .. ما أنا حلفتلك أهوه بالله تلاته ما حد فينا هايجيب سيره أصلا ً!!!.. أستغفر الله العظيم .. دي
إجازه دي واللا جنازه !!.. 
"" أستغفر الله العظيم ؟؟!!!..
> مبسوطة انتي دلوقتي وبنتك يا دكتوره ؟!!.. ما كنتش حتى عجباكي الإجازه نقضيها هنا .. اشربي بقى ..
ارجوك يا بني ارحمنا .. والله ما حد هايجيب سيرتك ولا هنتكلم عنك في حاجه .. أقولك : أنا هاعرفك كمان 
مكان الفلوس اللي معايا هنا في الشاليه .. إيه رأيك ؟
- أولا ً.. إنت مش بتفهم ليه من أول مره ؟!!.. بقولك أنا مش مؤمن أصلا ًبوجود الله اللي إنت بتحلفلي بيه
ده !!!.. وكمان الفلوس دلوقتي ما تهمنيش .. الأهم منها دلوقتي إني أتخلص منكو عشان أعيش مطمن ...
> ومين قالك بس يا بني إنك هاتعيش مطمن ؟!!!..
هو قتل الناس شيء سهل كده ؟!!.. يعني انت فاكر مثلا ًإنك لما تقتلنا إحنا الأربعة : هاتعيش مستريح ؟!!..
- وإيه المانع ؟!!..
"" ماتقولش أربعة يا (عماد) أرجوك !!.. لو هايقتلنا يقتلنا إحنا التلاته بس ويسيب (رانيا) ..! هيا ما شافتش
وشك .. ليه تقتلها يا جبان ؟؟..
> يا (ساميه) أرجوك أسكتي بدل ما أجي أنا اللي أقتلك دلوقتي !!!.. يعني شايفاه ماسك مسدس وهايقتلنا
وتقوليلوا جبان ؟!!!.. معلش يا ابني امسحها فيا أنا ... صدقني أنا عايز مصلحتك .. أنت بتقول إنك بعد ما 
تقتلنا هاتعيش مطمن .. وأنا هاسألك : هل انت قتلت حد قبل كده ؟!!..
- لا .. بس عورت ناس كتير بالمسدس .. يعني مش قتلتهم .. بس لو كنت عايز أقتلهم كنت قتلتهم ..
> أنا عارف .. أنا عارف .. طيب .. خدها مني حكمة ونصيحة .. ناس كتير بتقتل بعضها في الحروب ..
ودول بيعيشوا من غير تأنيب ضمير .. عارف ليه ؟.. لأنهم بيحاربوا عشان قضية معينة هما مؤمنين بيها :
وهما عارفين إن الناس التانيه على غلط .. وإنهم عدو ليهم .. أما إنك تقتل ناس بريئة : فصدقني والله : عمرك
ما هاتستريح !!.. هاتتمنى كل يوم إن الزمن يرجع بيك لورا ومكنتش قتلتهم !!!.. وهاتفضل في عذاب
نفسي : أتحداك إن لقيت ليه علاج إلا إنك تقتل نفسك وتنتحر : أو تهرب للمخدرات والخمره عشان تنسى
وتغيب عن تفكيرك : لأنك كل ما هاتبقى ف وعيك هاتفتكرهم ... صوتهم .. نظراتهم ..
- يعني أفهم من كده إن إنت اللي قتلت ناس قبل كده ؟!!..
> لا .. بس أقعدت مع ناس كتير منهم .. وشوفت إزاي إن أمراض الجسم ممكن يبقى ليها علاج .. وإن
ألام الجسم ممكن تسكن .. لكن استحالة مرض النفس وألمها هاتقدر عليه أبدا ً!!.. لأنه شيء من جواك ..
شيء مرتبط بيك في كل مكان وزمان هاتلاقيه معاك وما فيش منه مفر زي ما قولتلك إلا الموت أو الانتحار ! 
إنت ما سمعتش عن الأمريكان اللي انتحروا من التقتيل اللي كانوا بيقتلوه بوحشيه وظلم للأبرياء والنساء
والأطفال في فيتنام والعراق ؟!!!.. أهو دول رجعوا منتصرين : بس هما اللي قتلوا نفسهم وانتحروا من الإجرام
اللي عملوه وبيطاردهم في النوم واليقظه !!.. واللي فضل منهم حي أدمن المخدرات والخمره !!!.. 
- يا عمي كلامك حلو قوي .. بس بقولك أنا ملحد بقالي 3 سنين .. يعني بصراحه كده : ما عنديش ضمير
أصلا ً!!!.. وأنا مرتاح كده .. يا ريت بقى تيجو الناحيه دي إنتو التلاته .. وخلوا اللحظة دي تعدي على خير !
> صدقني كلامك غلط .. وكل اللي بتقولوا ده بيتهيألك .. ما فيش حاجه اسمها إنسان من غير ضمير ..
كل إنسان ربنا خلقه بضمير .. حتى أشر الناس في الأرض : ربنا خلقه بضمير ..
"" أيوه .. زي الراجل اللي النبي حكى إنه قتل 99 نفس .. يعني بعد ده كله : كان لسه جواه ضمير برضه
وعايز يتوب ...
- أيوووان .. عليكي نور يا دكتوره إذا كنتي فعلا ًدكتوره !!.. أهو أنا بقى لسه في أول مشوار الـ 99 :
ويا ريت تساعدوني شويه .. يا ريت تيجو الناحيه دي كلكوا لو سمحتوا بهدوء عشان ما تحسوش بحاجه !!!..
> الله يسامحك يا (ساميه) !!.. 
ممكن تسيبيني أتكلم مع الشاب لوحدي شويه لو سمحتي ؟!!.. ممكن ؟!!!..
قال 99 نفس قال !!.. يا سيتي عندك كلمه حلوه قوليها .. ده وقت الحديث ده دلوقتي ؟!!..
ده بدل ما تقوليله حديث مثلا عن جزات اللي يقتل مؤمن متعمد وتذكريه بجهنم والنار وعذاب ربنا ؟!!!..
واللا انتي ما بتفتكريش الحاجات دي إلا معايا أنا وبس ؟!!!..
- يا للا لو سمحتو .. ده آخر إنذار صدقوني ...
> اصبر بس يا بني اصبر .. يمكن تخرج من هنا حالك أحسن مما دخلت .. مين عارف .. اسمع مني بس :
وأنا مش هاطول عليك .. 
انت عارف إنت مشكلتك في إيه ؟!!..
- في إيه بقى يا سيدنا الشيخ ؟!!..
> من غير تريقا لو سمحت .. انت مشكلتك إنك مش مؤمن بوجود الله أصلا ً.. وعشان كده بوصلة حياتك
كلها متغيره صدقني .. وده سبب إنكارك حاجات لا يمكن إنكارها أصلا ً!!..
- أيوه يا عمي .. أنا لا مؤمن بالله .. ولا بالإسلام .. ولا بالنبي .. أنا تثقفت شويه : وعرفت أد إيه أنا كنت
مخدوع بالدين .. كل حاجه قدر ومكتوب قدر ومكتوب .. فقير : أصبر !!.. مريض : أصبر !!.. مظلوم :
أصبر !!.. المسلمين في العالم بيتقتلوا ويغتصبوا .. فين الله هنا لو سمحت ؟!!.. هه ؟..
> بص يا ابني .. أنا هاجيبلك الخلاصه .. بس أرجوك اهدا شويه ونزل المسدس ده ..
- لا .. المسدس هافضل رفعه كده .. عندك مانع ؟؟..
> لا .. براحتك .. أنا هانصحك نصايح لوجه الله : فيها النور اللي ينور لك طريقك وحياتك .. صدقني إنت
عايش من غير هدف .. وحتى الأهداف اللي انته راسمها في دماغك : حتت مرض صغير هايدمرهالك كلها !!..
ومش هايتبقى ليك إلا الألم والحسرة والندم وأخيرا ً: الرغبة في الموت !!.. 
- ليه التشاؤم ده يا شيخ ؟!!..
> أنا والله بقولك الحقيقة .. وأول خطوة عشان تنور حياتك : لازم تعرف إن الدنيا دي مش هيا الهدف !
مش هيا المستقر !.. دي الامتحان .. دي الإظهار .. كل واحد هايظهر في الدنيا دي على حقيقته .. وكل 
واحد ربنا هايسجل عليه او ليه كل شيء قاله أو عمله !!.. 
فالفقر اللي انت بتتكلم عليه ده : ده امتحان من ربنا اللي قادر يغني كل البشر !!.. لكنه اختار امتحانك
اللي يناسبك وهو الفقر !!.. هو ربنا اعرف بيك وباللي جواك من الخير والشر .. وعشان كده اختار الامتحان
اللي يناسبك .. والسؤال : هل كل اللي اتولد فقير او كان فقير : كفر أو عمل زيك كده ؟!!..
- ......
> يا ريت بس تتكلم معايا شويه وترد عليا وكأني صاحبك أو أخوك الكبير أو حتى في سن والدك .. 
- لا .. مش كل فقير عمل كده .. بس دول كلهم بيصبروا عشان وهم .. الله مش موجود !!.. يبقى ليه
نصبر ونعاني : في حين إني ممكن أسرق وأعيش أنا وأهلي وأتمتع وأمتعهم معايا ؟..
> يبقى إنت كده سقطت في الاختبار والامتحان للأسف !!.. وأما كلامك إن ربنا مش موجود : فكلام كله
وهم في وهم وكدب في كدب وما يصدقوش أصغر عيل !!.. يعني كل الكون ده وجسمك ده وعينك وودانك
وقلبك وصوابعك وكل كائن حي والتفاصيل المعجزة دي كلها : جت كده صدفة ؟!!!..
- ليه لأ .. ليه مش ممكن ؟!!..
> يا راجل حرام عليك .. ده اللي مش ممكن هو إنك تقول إن عربيه جت صدفه !!.. ولا حتى الشوفنيره
دي ولا التليفزيون ده جه صدفه !!!.. فما بالك بحتى ولو نملة صغيرة والله !!!.. يا ريت تجاوبني بصدق إذا
كنت فعلا شجاع .. فالشجاعه مش بس إنك تمسك مسدس ..
- مممم .. طيب .. وبعد اما نقول إن فيه ربنا .. هل هو يعرف اللي بيجرالنا ده ؟!!.. ليه يسيب الفقير
والمريض والمظلوم واللي بيتقتل واللي بتغتصب ؟!!..
> كويس جدا .. هنا بقى ييجي الاختبار اللي قولتلك عليه .. ربنا لو عايز الدنيا جنة : كان خلقها جنه ..
إنما هو مش عايز حد يكون في الجنه : إلا اللي يختار الخير والحق والصدق بنفسه : وهو عنده حرية إنه كان
يختار عليهم الشر والباطل والكدب ؟!!.. 
فالإيمان : خير وحق وصدق .. والكفر : شر وباطل وكدب !!.. ومن هنا نيجي لنقطه مهمه جدا ً: وهيا فيها
كمان سبب خلل كبير في تفكيرك في نظرتك للشر في الدنيا ..
- يا ريت بس الأول تقول لمراتك دي اللي بتقول عليها دكتوره : بلاش حركات الأفلام دي وما تحاولش
تتحرك ناحية الترابيزه عشان ما فقدش أعصابي !!!..
> اللهم طولك يا روح !!.. اللهم صبرني يا رب !!.. يا سيتي حرام عليك والله اللي بتعمليه ده !!!..
يعني أنا ما صدقت الشاب بيسمع ومنتبه !!.. وما تعرفيش أنا بجاهد نفسي أد إيه عشان أقول الكلام ده !
ارحميني الله يكرمك : وبلاش حركات (شيرلوك هولمز) دي دلوقتي هاتودينا في داهيه !!..
- أيوه كده .. ممكن تكمل دلوقتي ...
---- 
7))

"" ما شاء الله !!.. دانتا كلامك بقا إيه عن ربنا يا شيخ (عماد) !!.. كمل كمل !!!..
> لو سمحتي يا دكتورة .. أنا مش عايزوه يعتبرني شيخ ولا حاجه .. أنا دلوقتي بكلمه زي أخوه أو صاحبه
أو حتى والده .. 
- إظاهر فعلا حظي وقع في شيخ !!.. بس : هو فيه شيخ عنده شاليه ع البحر ؟!!.. دا الدنيا هنا مقطوعه
وحاوليها بوظان !!!.. والمفروض إن الشاليه أصلا ًكان فاضي !!.. أكيد فعلا في شيء متقدر لي الليلادي !
كمل يا شيخ كمل ...
> بص يا بني .. سبب من أسباب خلل نظرتك للشر في الدنيا : هو إنك فاصل الدنيا عن الآخره !!!.. 
يعني فاصل التعب عن الراحة !!.. زمان .. كنت قريت مثال بس مش فاكر فين بالظبط .. كان بيقول إن
فيه راجل وعنده اتنين من العبيد .. واحد فيهم مطيع وطيب .. والتاني علطول يقاوح وجواه مش كويس ..
وف يوم الراجل ده كان عايز يخرج بيهم لأجمل حته في الوادي : في منطقه خضرا وجميله جدا ًبشجرها 
وهواها وميتها وشلالاتها .. ولكن العبد المقاوح : ما رضاش يشيل الحاجات بتاعتهم وهما رايحين للوادي !
وقعد يعارض ويعترض .. لحد ما الراجل قاله : طيب .. توافق إن العبد التاني الطيب ده يشيل الحاجات دي
لحد هناك : وانت اللي تبقى تقعد جنبها وما تسيبهاش وتحرسها ؟!!!.. فوافق .. وفعلا ًده اللي حصل ..
بقى العبد اللي تعب : هو اللي بيلعب وبيستمتع وفرحان بكل الجمال اللي حواليه : والتاني هو اللي قاعد
بيتحسر ويندم !!..
- كلامك جميل يا شيخ .. بس في المثال ده الراجل خلاهم يختاروا .. ولكن أنا ما اخترتش في حياتي إن
ربنا يمتحني بين الكفر والإيمان ؟!!..
> لا .. ربنا قال في القرآن إنه عرض الأمانه : وما قبلهاش إلا الإنسان : طمعا ًفي الجنه أكيد والنعيم
فيها وجوار ربنا .. فظلم نفسه بقبولها لأن الكافر من البشر ليه النار .. وكان جاهل بأن عرض الأمانة
وقبولها ساعتها سهل : لكن وقت المطالبة بيها فعلا ًبيكون صعب !!!..
- طب أنا فين هنا ؟!!.. أنا باتكلم عني أنا .. وأنت بتتكلم عن سيدنا (آدم) !!..
> لا .. ربنا لو كان عايز يذكر سيدنا (آدم) في الموقف ده كان ذكره بالاسم .. ولكنه قال : " حملها
الإنسان " !!.. فكل إنسان كان ده هو تصرفه .. 
- طيب ماشي .. هاعديهالك دي .. طيب : أنا كإنسان : مش فاكر الموقف ده أصلا ًوعرض الأمانة !
ووالله لو كنت أفتكره : كنت عرفت أكيد طبعا ًإن ربنا حق وموجود وما كنتش هاكفر بيه ؟!.. صح ؟
> من تاني لا !! في آيه تانيه ربنا بيقول فيها إنه أخد من بني (آدم) من ظهورهم : ذريتهم .. وأشهدهم على 
أنفسهم : ألست بربكم : قالوا بلى شهدنا !!!.. ومعنى الكلام ده : إن كل إنسان بالفطرة : عارف إن
فيه ربنا خلقه .. ودي هي الفطرة والضمير اللي جوه كل واحد مهما كفر أو ألحد أو حتى أشرك بالله !!.. 
- طيب يا شيخنا .. وأنا مش هاكدب عليك .. 
أنا فعلا حاسس من جوايا إن فيه ربنا .. بس إيش عرفني إن أصلا أرسل لينا رسل ؟.. أو حتى إن الإسلام 
ده هو الدين الخاتم للناس كلها ؟!!..
> أولا ً.. مفيش حد غير ربنا هو الله أرسل رسل ورسالات بيقول فيها اعبدوني وأطيعوني !!.. كل 
الكتب بتاعت الأديان الوثنيه : إما منقوله من الرسالات الربانية مع التحريف : أو اللي كاتبها بشر عن
آلهه مزعومه ...
- طب ما هو برضه أنا ممكن أقول إن القرآن : هو اللي كاتبه بشر عن إله مزعوم ؟!!..
> أولا ً: فيه حاجه اسمها معجزات .. ودي كانت العلامات اللي ربنا بيديها لرسله وأنبيائه عشان الناس
تصدقهم إنهم من عند الله .. بس ده كان في الماضي .. يعني المعجزات المادية .. عصا سيدنا (موسى) .. ناقة
سيدنا (صالح) .. قدرة سيدنا (عيسى) على شفاء المرضى وإحياء الموتى بإذن الله ..
وأما سيدنا (محمد) .. وعشان رسالته هيا اللي هاتستمر لكل بشر وفي كل مكان : فكان ليه معجزات ماديه
في قومه وبين أصحابه .. ولكن كانت معجزته الأساسيه واللي هايتحدى بيها الله الجن والإنس : هيا القرآن !
معجز في بيانه ونظمه وبلاغته .. ومعجز في إخباره بالغيب الماضي والحاضر والمستقبل .. ومعجز في تشريعه
وأخلاقه ومعاملاته وحدوده ..
"" إيه ده إيه ده .. مش ممكن يكون (عماد) هو اللي بيتكلم قصادي .. أنا مش قادره أصدق نفسي !!!..
- يعني إيه يا دكتوره ...؟!
> خليك معايا أنا يا بني ..
- بص يا شيخ .. أنا هاجيبهالك من الآخر .. أنا مؤمن بكل اللي إنت بتقوله ده .. أنا مش هاضيع وقتك 
ووقتي .. والله أنا عارف إن كل ده صح ...
> طب امال إيه بقا ؟!!..
- هاقتلكوا يعني هاقتلكوا !!..
> صدقني يا بني .. أنا مش مهم بالنسبه لي دلوقتي إنك تقتلنا أو ما تقتلناش !!.. أنا اللي عايز أعرفه
دلوقتي حقيقي : ليه إنت بعد أما تقول إنك مصدق كل ده : وإن الله موجود والإسلام والنبي حق :
ليه بترمي كل ده ورا ظهرك وبرضه مصر على تجاهله في حياتك وعايز تقتلنا ؟..
صدقني أنا حقيقي عايز أعرف إيه السبب ؟!!.. إيه السبب ؟!!..
- طب انت بتعيط ليه يا شيخ ؟؟!!.. ليه الدموع دي ؟!!.. وكأن مثلا ليك ابن أو أخ ضايع تايه زيي 
وعايز تعرف السبب ؟!!..
"" ممكن تعتبرها حاجه زي كده ..
> أيوه .. ممكن تقول حاجه زي كده .. ساعدني .. ليه انت بتعمل كده ...؟
- كده مش كويس .. أديني أنا كمان بدأت أدمع ...!
بص يا شيخ ومن الآخر : أنا بقول إن ربنا هايسامحني عشان هو عارف إني عارف إنه موجود !!!..
وعشان هو عارف إن فيه ظروف هيا اللي خلتني كده أو خلتني أفكر التفكير ده !!!..
وعشان عارف إني من النوع العنيد اللي عايز يفهم كل حاجه ويتقبلها بمزاجه وبعقله وغير كده لا !!
> طيب وهل انت عارف إيه اللي ربنا هايحاسب عليه الناس يوم القيامة ؟!!..
هل ربنا قال : " وما خلقت الجن والإنس إلا ليعرفون " ولا قال : " إلا ليعبدون " ؟!!!..
كل الناس زي ما قولتلك من شويه : عارفه من جواها إن ربنا موجود وإن ربنا هو اللي خلقهم ....
وربنا أشهدهم على كده في عالم الذر .. لكن السبب اللي ربنا بعت الرسل وأنزل الرسالات ليه هو :
عبادته !!.. يعني طاعته في كل ما أمر .. والانتهاء عن كل ما نهى !!..
هو ده اللي ربنا هايحاسب عليه فعلا ً!!.. توحيد الألوهيه إن كنت سمعت أو قريت عنه !!!..
يعني من الآخر : 
(إبليس) عارف ربنا أكتر منك !!.. بس عصاه وما تابش !!.. وأنت بتقول إنك عارف ربنا : بس
برضه بتعصيه : والمصيبه هنا إنك مانتش ضامن حياتك لحظة واحده يا مسكين !!!..
يعني ممكن تقع إنت دلوقتي ميت .. ويكون ده وقت أجلك !!.. وإحنا اللي نعيش : وتخش جهنم
وبئس المصير !!.. خالدا ًمخلدا ًفيها ً!!!.. لا فرصة تانيه ولا غيره !!!.. إنت ضيعت عمرك بعد اما
عرفت إن الإسلام حق وإن ربنا حق وإن محمد حق !!!.. فإيه عذرك ؟!!..
طول العمر ؟.. كتير طال بيهم العمر واستمروا على كفرهم وجحودهم ومعصيتهم لله !!!!..
وزي ما قولتلك :
طالما كان فيه فقير وما كفرش .. ومريض وما كفرش .. ومظلوم وما كفرش .. ومقتول ومغتصبه 
وما كفروش : كانوا حُجة بكده على اللي تعرضوا لنفس ما تعرضوا ليه أو حتى أقل : ولكن كفروا 
للأسف !!!..
"" مظبوط كلامك يا شيخ (عماد) !!!.. وفيه كمان أساتذة جامعات استغلوا عقولهم في تضليل
الناس ونقل ضلالهم وتوهانهم للشباب : وما اتقوش ربنا في اللي بيكتبوه وبينشروه : وفي المقابل
فيه كـُتاب استغلوا مواهبهم وعقولهم في تقريب الناس للإيمان ولعبودية الله وطاعته وتحبيبهم فيه 
وتصبيرهم على ابتلاءات الدنيا ومصايبها وشرح حقيقتها زي ما انت عملت دلوقتي يا شيخ !
- طيب أنا عايز أعرف دلوقتي : 
إنتي بتعيطي ليه ؟!!.. 
وإنت بتعيط ليه ؟؟؟!..
وأنا بعيط ليه ؟؟!!..
# واتس جو أون (إيماد) ؟.. هواي يو كراينج آند مامي ؟!!!..
يو تيلنج أ فيري جود سبيتش .. هواي يو استوب ؟..
> اللهم غفرانك !!.. اللهم غفرانك !!..
"" يعني أفهم من كده يا (عماد) إنك تبت إلى الله خلاص ؟!!..
> استغفر الله العظيم .. اللهم إني تبت إليك .. اللهم إني تبت إليك ..
يا سيتي إنتي إيه اللي جايبك لحد هنا عندي ؟!!.. إحنا مش قولنا تخليكي هناك ؟.. 
"" سيبك من الكلام ده دلوقتي وقولي : إنت تبت حقيقي لربنا ولا لأ ؟.. جاوبني ؟..
> أيوه .. أيوه .. أشهد أن لا إله إلا الله .. وأشهد أن محمدا ًرسول الله ...
"" إهيء إهيء إهيء - تبكي - : الحمد لله .. الحمد لله ... الخطة نجحت ...!
> خطة ؟!!.. خطة إيه ؟؟..!
^ أنا سليمة يا دادي ...
> هااااااه !! - شهقة مفاجأة أو خضة كما نسميها بالمصري  - : (رانيا) ؟ إنتي صاحيه ؟!
^ أيوه يا دادي صاحيه !!.. 
> أنا مش فاهم حاجه !!.. هو فيه إيه بالظبط قبل أما اتنرفز ؟!!!..
"" ده (ياسر) ابن اختي (سهام) اللي إنت ما شوفتهوش أبدا ًيا (عماد) ؟!!..
> (ياسر) !!!..
طب والدم ؟؟!!..
^ حبر أحمر يا دادي ؟!!..
> يا ولاد الإيه !!!.. دي فكرة مين دي ؟!!..
- فكرتي أنا يا عم (عماد) .. وأرجوك تسامحني .. بس إحنا كان قصدنا خير ..!
> خير !!!..
توقعوا قلبي في رجلي وتخلوا عرقي مرقي لأكتر من ساعه وتقولي خير ؟!!!..
"" استنى بس يا (عماد) ما تتعصبش .. ما كنت حلو دلوقتي .. احمد ربنا .. 
يا راجل داحنا خليناك تنطق الشهادة !!.. سبحان الله !!.. دا انتا نقضت نفسك بنفسك في ساعه !
كل ده عشان شوفت الموت بعينك بس ؟!!!.. أمال لو كان جالك فجأه كنت عملت إيه ؟!
> الحمد لله فعلا ً- يرمي نفسه على أقرب مقعد وقد استبد به التعب من الشد العصبي والجسدي - 
بس أنا متأكد أن الفكره دي فيها بصمة (ساميه) و(رانيا) !!.. أنا عارفهم ...
- هو فعلا ًيا عمي التفاصيل من عندهم .. أصل الفكره من عندي من أيام .. واتفقت مع خالتي 
(ساميه) على كل التفاصيل إمبارح بالليل قبل أما اتسافروا ...
> أتاريكي قعدتي يجي ساعتبن في أوضتك مع الموبايل !!!.. أما كيد نسا صحيح !!.. 
والله لو عمالولكو مسابقه لطلعتوا الأول إنتي وبنتك !!.. لا .. وما فيش ضحكه واحده في النص كده ولا
كده !!!.. أه يا قلبكوا !!!..
- المهم يا عمي تسامحني .. والله ما كنتش تعرف خالتي كانت في حاله عامله إزاي بقالها فتره ...
ولما والدتي حكيتلي : جت في دماغي الفكره دي : عشان نقطع الشك باليقين : ونخليك تقول كل 
اللي جواك بصراحه .. لأن خالتي تعبت معاك جدا ًعشان تقولها إنت حالتك إيه بالظبط : وما عرفيتش ..
فسامحني ...
> لا يا ابني .. انتو كلكوا اللي تسامحوني .. سامحيني يا (ساميه) .. أنا ظلمتك كتير وافتريت عليكي
كتير .. وفعلا ًكنت هاضيع أولادي !!!.. ما كنتش أتخيل إن بعد العمر الطويل ده لسه الواحد بيتعلم !
وأول حاجه يتعلمها : هيا إنه يتعلم نفسه من جواه !!!.. النفس دي ملعبكه قوي ! سبحان الله !!!..
أنا كنت فعلا ًهاضيع نفسي بنفسي .. 
تكبر .. زائد غرور .. زائد عناد .. زائد تجاهل ..! والله ما كان ينقصني شيء عشان أعرف إن الله 
حق ولا إن الإسلام حق ولا إن النبي حق !!..
اللهم اغفر لي .. 
اللهم اغفر لي ..