عندما صرت ملحدا

عندما صرت ملحدا !!!..
(والعياذ بالله) .. قصة بقلم أبو حب الله ...

-----------------
لعله من أصعب الأشياء في حياة الإلحاد :
هو أن الملحد يحيا دوما : وهو يعلم أنه يضحك على نفسه : وقبل أن يضحك على غيره !
يقول عز وجل :
" وجحدوا بها : واستيقنتها أنفسهم ظلما وعلوا !!.. فانظر كيف كان عاقبة المفسدين " ..!
النمل 14 ..
-----------------

(1)

>> ما زال يتذكرني ....! 
أعطيه ؟؟.. أم لا أعطيه ؟؟.. أعطيه ؟؟.. أم لا أعطيه ؟؟..
نظراته تطاردني من أول الشارع للأسف .. ويتوقع أن أعطيه مالا ًكما كنت أفعل في الماضي !
ولكن ماذا عساي أن أفعل : فقد صرت ملحدا ً!!!.. وهذا العجوز المسكين لا يعرف بالطبع !
ولن يفهم ....!
ولا دافع واحد لي اليوم لإعطائه المال : ولو حتى على سبيل الشفقة !!!..
فقد عاهدت نفسي أن أكون ملحدا ً( ماديا ً) ( مخلصا ً) : ولا أتصرف إلا وفق ( مباديء ) الإلحاد !
وإذا كان المسلم يفتخر إذا اتبع دينه وشرعه وسنة نبيه ولو في أبسط تفاصيل حياته حذو القذة بالقذة :
فهو ليس بأكثر (( إخلاصا ً)) مني !!!..
وأنا ما زلت على عهدي !!!..
-----

>> لا .. لن أنظر إلى عينيك أيها العجوز المسكين .. فلا تنتظر مني ذلك !!!..
أنت في نظر الإلحاد : ضعيف ولا فائدة منك !!!..
فلا عمل .. ولا إنجاز .. ولا أي شيء تستطيع أن تفعله لأي أحد في المجتمع :
ودعك حتى من أن تؤده ِلي أنا !!!.. وذلك بالطبع إذا استبعدنا دعاءك لي أو لغيري هههه !
ومن الجانب الآخر : فلا أجد أي مبرر (( إلحادي )) لأن أعطيك مالا ًبلا مقابل !!!..
إذ كيف أتحصل أنا على المال : ثم يصلك هكذا بغير تعب ولا جهد ولا ميزة غير أنك تنتظر الموت !
مممممم ...
طب وماذا لو كنت سأعطيك المال بنية أني لو صرت مثلك : أجد يومها مَن يعطيني مثلما أعطيتك ؟
همم ...
هذا أيضا ًاحتمال مستبعد من وجهة نظر الإلحاد !!!..
فأنا لا أؤمن أصلا ًبأنه هناك ( قَدَر ) سيقوم بفعل ذلك معي ومعك : ليرد الجميل !!!!..
إذ : من أين سيعلم الناس في المستقبل إذا ما صرت أنا عجوزا مسكينا ً:
أني كنت أعطي عجوزا ًمسكينا ًمالا ً؟؟!!..
مممممم ...
هل أعطيه مالا ً: وأجعل أحد المارة يصورني بالموبايل ؟؟؟؟؟...
فكرة جيدة ههههه ... ولكن !
ماذا لو ضاعت مني هذه الفيديوهات بعد سنوات ؟!!!..
ورطة .......!
أرى أن أؤجل التفكير في ذلك إلى وقت ٍآخر ...
----------------

(2)

= كلمت أبوك يا حايس عن الشقة اللي في الدور الأول ؟؟؟..
صدقني .. لو ما كلمتوش وزنيت على ودانه : أخوك الكبير هو اللي هايخودها :
وهانتدبس إحنا في الشقة اللي في الدور التالت من غير أسانسير !!!..
>> يا سيتي إنتي ما فيش في دماغك غير الفكرة دي من ساعت ما نزلنا من أمريكا ؟!
= أيوه طبعا !!.. 
لأن أخوك الكبير للأسف ساب فرنسا ونزل يستقر في مصر في نفس وقت نزولنا تقريبا !
وأبوك إحتمال كبير يديله هوا الشقة اللي في الدور الأول عشان السلم هايتعبه لو في التالت !
عشان كده لو ما بدأتش إنت تكلم أبوك من دلوقتي وتزن عليه : 
هايحصل زي ما قولتلك : ونتدبس إحنا في الدور التالت يا حلو !!!..
>> طيب ما نسيب أبويا هوا اللي يختار يا حايسة ؟؟.. هيا مش عمارته وهو حر فيها ؟؟؟..
إنتي نسيتي المبدأ ده من مباديء الإلحاد ولا إيه ؟؟..
= لااااا .. إنت اللي نسيت إن من مباديء الإلحاد إنك تسعى إنك تكون الأقوى والأفضل :
وبأي الطرق .. هيا دي الحياة اللي أعرفها .. البقاء للأقوى .. والغاية تبرر الوسيلة ..
>> بس لو انتي عايزة الصح يا حايسة : الدور الأول من حق أخويا الكبير !!.. ولكذا سبب !
منها السن وتعب السلم عليه فعلا وخصوصا الذبحة الصدرية اللي جاتله مرتين قبل كده .. 
ومنها إني أرد له بعض جمايله معايا من صغري ...
ما تنسيش إنه هوا اللي كان بيصرف عليا ويهتم بيا لما كان أبويا مسافر .. 
وهوا كمان اللي إداني فلوس السفر لأمريكا لو تفتكري : واللي لحد دلوقتي ما دفعتهالوش !!..
= صدقني دي مشكلته هوه : مش مشكلتك إنت !!!..
هو بيتصرف بمباديء الدين .. يبقى إنت عليك إنك تتصرف بمباديء الإلحاد !!!..
إنت نسيت عهدك مع نفسك ولا إيه ؟؟!!..
-----

>> من أسوأ المشاعر ما أمر به الآن بسبب ما سأفعله مع أخي الأكبر !!!..
ألا يكفي ما عانيته من نظرات ذلك العجوز المسكين صباحا ً؟؟!!..
هو لا يعرف أني حتى لو كنت أعطيته مالا ً: كنت سأصير في عين نفسي ( منافقا ً) !!..
لأني سأعطيه وأنا أود ألا أعطيه !!.. ولولا إحراجي منه ما أعطيته !!!..
والآن ...
عليّ أن أخدع أخي الأكبر .. وأن أؤثر على أبي أيضا ًبطريق غير مباشر !!..
عليّ أن أحوز على أفضل كل شيء : بأي طريقة .. حتى ولو بالغش والخداع !!!..
هذا هو قانون الإلحاد .. قانون الغاب ...! قانون البقاء والتمتع بالحياة التي بعد الموت لن تعود !!..
هذا ما عاهدت عليه نفسي !!!..
ولكن أخي الأكبر ؟.. وجمائل صنائعه معي ؟!.. أرى الآن أن أجعل كل ذلك تحت قدمي لأستمتع ! 
ورطة .......!
أرى أن أؤجل التفكير في ذلك إلى وقت ٍآخر ...!
----------------

(3)

- كومونتا لي فو أوجوردوي ؟؟..
>> هه ..! إيه يا بويا ده .. إنت لسه فاكر الفرنساوي أهوه رغم إنك قعدت بعده في إيطاليا 10 سنين ؟
- أمال إيه يا حايس .. أنا قعدت في فرنسا يجي 7 سنين .. إزاي أنساها ؟؟..
إلا صحيح .. إنتا بتعمل مدونة جديدة ولا إيه ؟؟؟..
>> إيه ؟؟.. هه ؟؟.. أنا ... أيوه .. مدونة كده على السريع ..
- بس أنا شايف شوية عناوين طبية !!.. هي مدونة طبية ولا إيه ؟؟.. إنت سيبت الهندسة ؟ هههه 
>> لا يا والدي .. أسيب الهندسة إيه بس .. < وبعدين في الورطة دي ؟ هاتفقس كده ! >
كل الحكاية وما فيها .. إن ليا شوية أصحاب تعبانين في إنجلترا ..
وتعبوا من مصاريف العلاج والاستشارات هناك .. وكانوا عايزين تجميعة شوية نصائح طبية من النت :
تكون جاهزة وبالإنجليزي .. فقررت إني أعملهالهم : خدمة لوجه الله يعني ....
- أأأأأه .. ديجيفو بينيس ..! بارك الله فيك يا حايس ..
بس أنا مش شايف يعني اسمك في المدونة ؟؟.. أو أي إشارة لشخصك ؟؟..
>> ههه ؟؟.. آآآه .. 
ما هو أصل أنا عايزه عمل (( خالص )) لوجه الله لكل اللي هايقرا مواضيع المدونة ..!
ومن كمال الإخلاص لوجه الله : إنه ما حدش يعرف اسمي !!.. 
حاجه كده زي فاعل خير يعني < حرمت أسيب الباب مفتوح تاني أبدا ً!! > 
فيلانثروب .... 
- اسمها فيلونتخوب يا جاهل .. هههه .. لساك بتحفظ وتنطق الفرنساوي زي الإنجليزي ؟!
>> هههه .. أهو لسه باتعلم .. بقالي فترة سايب كورس النت .. شكلك كده إنت اللي هاتكمل معايا ..
بس عاهدني يا أبويا إنك ما تقولشي لحد حقيقي عن المدونة دي .. ولا حتى لسعيد .. ماشي ؟؟
أنا عايزه عمل ( خالص ) لوجه الله زي ما قولتلك ...
- بيا ... 
-----

>> هوووووووف !!.. كاد أبي أن يفضحني .. أتمنى ألا يخبر أخي أني كنت أكتب مدونة طبية !
ها قد انتهيت تقريبا ً.. لم يستغرق نقل 40 نصيحة طبية متنوعة وقتا طويلا كما كنت أتوقع ...
باستثناء محادثة أبي بالطبع .... هههه ..
والآن .. لم يتبقى في هذه المدونة إلا مسك الختام ... النصيحة التي سأضعها بنفسي !..
ويجب اختيار عنوان معبر وجذاب وخادع ............ ههه ..
(( بعكس ما كان يظن الأطباء : دراسات حديثة تثبت فائدة صعود الدرج لعلاج الذبحة الصدرية ! ))
!!!!..
نعم .. العنوان جيد ...
فبجانب مواضيع أخرى في النت عن فائدة صعود السلالم عموما للجسم والقلب والنفس :
سيأتي هذا الموضوع الوهمي من تأليفي : ليدفع أخي لأخذ شقة الدور الثالث .... هههه ..
عبقري أنا ...
نفس التكنيك الذي نتبعه كملاحدة في زرع مواضيعنا في النت .... هههههههه ..
حيث يكفي أن يراه الخرفان مكتوبا ً: ليصدقونه طالما أنه في أحد المواقع النتية الشبكية !
أذكياء !!!.. رغم أن دينهم يقول لهم : " فتثبتوا " !!!.. ولكن لا حياة لمَن تنادي ..!! 
فقد صاروا أخيرا كالقطيع الهائم على موائدنا في المنتديات والمدونات والفيس والتويتر ! 
مممممممممم ...
ولكن ..
ماذا لو أخذ أخي الأكبر شقة الدور الثالث بالفعل : ثم وقع له مكروه حقيقي أو .......
أو مات بالذبحة الصدرية من مجهود صعود السلم ؟؟!!..
هل أعتبر ذلك - وفي نظر الإلحاد - شيئا ًمحزنا ًلموت أخ ؟؟.. أم مفرحا ًللميراث ؟؟؟؟..
ورطة .......!
أرى أن أؤجل التفكير في ذلك إلى وقت ٍآخر ...!
----------------

(4)

= إنت داهية يا حايس !!.. فكرة جهنمية خدعت أخوك فعلا ً!!!..
بس لاحظ برضه إنه لولا إنه مقفل وساذج ومخدوع فيك وخد كلامك بحسن ظن :
كان ممكن يدور بنفسه على النت ويلاقي مواضيع تانية بتحذر من مجهود طلوع السلم والذبحة !
>> ما أنا برضه لما جيت أبحث في الجوجل قدامه :
كتبت نفس عنوان الموضوع بتاعي بالضبط عشان يطلع علطول .. 
ما تنسيش إن المدونة كانت لسه جديدة والمفروض إنها ما تطلعش في أول نتايج بحث الجوجل ..
= المهم إنها عدت على أخوك .. وأنا شايفاه طالع نازل كل يوم أهوه : وما فيش مشكلة !
>> أتمنى فعلا إنه ما يبقاش فيه مشكلة لإنه يعز علي أخويا شويه .. عمل معايا خير كتير ..
= سيبك بقه من الكلام اللي ما لوش وزن في عالم الإلحاد والمادة ده ...
يعز عليا .. ضمير .. خير .. أخويا ....
وخلينا في المهم ...
دلوقتي وبعد ما حلينا مشكلة الشقة : إيه المشروع اللي استقريت عليه ؟؟.. وفين ؟..
أرجوك تركز في المشروع ده يا حايس .. ده تحويشة العمر ...
عايزاك تجمع فيه كل المعلومات وتاخد بكل أسباب النجاح في السوق المصري ..
أنا ما يهمنيش نوع المشروع إيه .. ياكشي حتى يطلع مصنع ويسكي أو مزرعة خنازير أو بقر !
أنا عايزة فلوس ونجاح وبس : نشوف بيهم الدنيا ونعيش حياتنا ..
إنت عارف هيا ( حياه واحده ) وبعدين موت وعدم : وأنا لسه ف دماغي أحلام كتير وأمنيات ما تحققتش !
أرجوك ما تخذلنيش المرة دي ولا بفلوسي اللي هاحطها معاك في المشروع .. 
دانا سبب رئيسي إني سبت الدين معاك من زمان : هو إننا نتمتع بقه ونعيش كل اللي عايزينه ..!!
مع إنك خذلتني في الخلفة يا حايس !!!..
>> نعم نعم نعمم ؟؟؟.. مش إنتي اللي قولتيلي من أول يوم جواز إنك مش عايزة تخلفي :
إلا بعد أما تطمني من حياتك معايا ؟؟؟...
= طيب وبعدين ؟؟؟.. أديني بقالي سنتين قولتلك نفسي أخلف أهوه : وإنت ما فيش ؟!!..
>> ما أنا قولتلك دي أسباب نفسية فسيولوجية أتأثرت بيها لما رفضتي إنتي الخلفة أول مرة !!..
= ههههههه !!.. إنت فاكرني أخوك الكبير ولا إيه يا حايس !!..
إياكش تكون هاتعملي مدونة أنا كمان تقولي فيها الكلام ده !!!.. 
>> بصي يا حايسة : أنا ما بعرفش أركز في موضوعين في وقت واحد ..
وإنتي شاغلاني علطول بطلباتك دايما ومن أول ما اتجوزنا : 
إشي خروج وإشي صاحبات وحفلات وسفر وعربية وكوافير وتجميل وهدوم ومكياج !!!.. 
وحتى أهوه واحنا بنتكلم في مشروع عمرنا ومستقبلنا : برضه بتشتتيني في موضوع تاني خالص !
أفكر في إيه أنا دلوقتي بقه ؟؟..
اختاريلك موضوع واحد بس نتكلم فيه والتاني بعدين ...
= موضوع فكرة المشروع طبعا ً...
>> وأنا من ناحيتي يا سيتي باطمنك .. أي مشروع في إيدي هاينجح .. بس يبدأ بس ..
أنا قعدت مع ناس صحابي ومعارف كتير بره وهنا .. وعرفت أسرار النجاح في أكتر المشاريع !
= وإيه هيا بقى أسرار النجاح دي يا فالح ؟؟؟..
>> أسرار كتيره مش هاقدر أقولك عليها كلها طبعا ...
بس خدي عندك مثلا ً: سر التغيير البطيء الغير مُلاحظ ...
= وده إيه ده بقا ؟؟..
>> مش قولتلك .. دا بقه يا سيتي معظم مشاريع المعلبات والألبان والعصاير ماشيه بيه ..
في الأول : تلاقي المنتج كده عليه القيمة وطعمه طبيعي وحلو ... حاجه كده تربي زبون يعني ..
وبعدين مع الوقت :
يبدأ تخفيف وتقليل الجودة .. زيادة ميه في اللبن .. مكسبات طعم في المعلبات والعصاير ...
وطبعا ًالناس أو الأطفال في الأول بتستغرب شويه .. 
لكن بيفتكروا إن العيب ممكن في الإزازه دي لوحدها : أو في العلبة دي المرة دي ...
وبمرور الأيام : بيبدأوا يتعودوا على الطعم الجديد : ويتنقل الطعم الحلو القديم للذكريات !!!..
لحد ما في أقل من تلت أربع سنين ولا حتى أقل من سنتين :
بيكون المنتج اتغير تقريبا خمسين في الميه ولا أكثر عن أول ما بدأ : ومن غير ما حد يشتكي !
وهايشتكي لمين أصلا ً!!!!.. وهايقول إيه ؟؟..
= آه يا مجرم !!!.. إنت جبت الأفكار دي منين صحيح ؟؟؟..
>> مش بقولك خبرتي أكبر من خبرتك : وإني استعديت للمشروع ده من زمان !!!..
وخدي عندك كمان : سر تقليل الحجم ...
= لا .. ده عارفاه وملاحظاه أكتر من السر الأول ...
السر الأول ورغم إني لاحظته فعلا في حاجات كتير بتتاكل وتتشرب :
إلا إن الخادع فيه فعلا إن المبررات اللي بيتخيلها الواحد فينا لتغيير الطعم : كتيرة !!..
مرة نفتكر إن التغيير مننا إحنا .. أو من العلبة أو الإزازة دي بس فعلا ...
ومع شغلة الحياة الواحد مش في دماغه لا يسأل ولا يشتكي !!!..
أفكار جهنمية يا حايس فعلا ً..
أهو أنا كده فعلا زادت ثقتي فيك من سبعين في الميه : لتسعين في الميه ..!!
خلاص .. إعمل المشروع اللي انته عايزه ...
مصنع .. مستودع .. صيدلية .. شوف انت واختار .. واختار المكان كمان : 
ده أهم حاجه ...
>> ولا مصنع .. ولا مستودع .. ولا صيدلية .. 
أنا تقريبا اخترت المشروع والمكان بنسبة كبيرة .. فاضل أتأكد بس من شوية معلومات ..
= إيه ده بقه يا حايس ؟؟.. إنت بتفكر من غيري في موضوع مهم وحساس زي ده ؟؟..
إنت ناسي إني مشاركة معاك في راس المال ولا إيه ؟؟؟..
>> لا يا سيتي مش ناسي ولا حاجه ..
بس زي ما قولتلك ..
الموضوع إني كنت بجمع شوية معلومات : وفاضل أتأكد منها ...
فيه موقع في النت لقيته : بيعرض أفكار مشاريع كويسه وتكلفتها المبدئية ومكانها المقترح ..
وفيه واحد بصراحة عارض فكرة مشروع .. ولكنه كان طالب فيها سمسرة ..
والتفاصيل هايبعتها على الخاص للي هايدفع له ..
وأنا دفعتله .. وصراحة : فكرته عجبتني فعلا .. وخصوصا إنه أمين :
وما قالش لحد تاني عليها زي ما لاحظت ..
يعني أنا لو مكانه مثلا ًومباديء الإلحاد : كنت على الأقل عملت الحركة دي مع عشرة :
وأخدت منهم الفلوس كلهم وسبتهم بقه ياكلوا في بعض !!!..
= إنت عفريت من يومك يا حايس ... بس إيه هو المشروع ؟؟..
>> مجمع تجاري كبير بمساحة كبيرة تحت مجمع أبراج سكنية جديدة ..
المجمع فيه محلات هدوم وسوبر ماركت وحلاقه ومطاعم إلخ إلخ ..
هو بعتلي صور المجمع وعنوانه .. وفاضل أروح أشوفه بعيني فعلا ً..
هو مشكلته إنه بعيد شويه عن العمران زي ما فهمت ..
بس هو بيأكدلي إنه بسرعة جدا هايتملي ناس أول ما يتفتح باب البيع والتمليك ..
وخصوصا وإن فيه مبنى كبير قدامه بيتبني : بيحفروا في أساساته فعلا وصورهالي :
بيقول إنه هايكون مبنى حكومي هايتملي موظفين برضه عن قريب :
في خطة الدولة لنقل بعض المصالح الحكومية بعيد عن نص البلد عشان تخفيف الزحمة .. 
= الفكرة فعلا ممتازة .. والمجمعات دي لما بتشتغل فعلا بتجيب دهب ..
بس لازم تتأكد يا حايس الأول وزي ما قلت ..
وعلطول تبقى تقولي وصلت لإيه ...
------------

(5)

>> أهلا بيك يا أستاذ طروبش ...
* أهلا بيك يا أستاذ حايس .. في ميعادك تمام ..
>> شكلك غير ما كنت متخيلك من صوتك وكلامك في المنتدى ...
* ههههه .. للأحسن واللا للأسوأ ؟؟..
>> يعني .. صوتك كان يوحي بإنك أكبر في السن شويه وجسمك ضخم ..
* هههه .. أعتقد إن دي حالة عامة عند كل اللي يشوفني بعد ما سمع صوتي أو قرا كلامي ..
>> هو ده المجمع السكني ؟؟..
* هههههههه !!! هو إنت شايف غيره حواليك ؟؟!!.. أيوه يا سيدي .. الأربع أبراج دول ...
ولو إنت وافقت على المشروع : هايكون ليك كل الدور الأرضي والميزانين ..
>> طبعا الدور الأرضي متصل من تحت الأربع أبراج .. صح ؟؟..
* صح ...
والمالك الأستاذ عماد مستنينا جوه عشان يتكلم معاك ويوريك كل المستندات عشان تطمن ..
>> طب كويس .. إللا على فكره ... هو الحفر ده للمبنى الحكومي اللي إنتا قولتلي عليه ؟؟..
* أيوه .. شوف مساحته كبيرة إزاي ...
أنا سمعت من معلومات أكيدة إنه هايطلع 7 أدوار ...
وشوف انت بقه 7 أدوار دول لما يحتاجوا فطار كل يوم الصبح وغدا أو طلبات وهما راجعين لبيوتهم ..
بقولك مشروع ناجح وأكيد ...
>> أنا متهيألي إن الموظفين اللي هايتنقلوا هنا : ممكن يكونوا هما معظم اللي هايشتري شقق المجمع ..
* ممكن .. وخصوصا وزي ما قلتلك قبل كده : إن الخطوة الجاية هاتكون مدرسة ومستشفى إلخ إلخ ..
وكل ده هايخدمك إنت في الآخر .. وهاتقدر تبيع وتقسم في المجمع بتاعك مع الوقت ...
مشروع ناجح ميه في الميه زي ما قلتلك يا أستاذ حايس ...
>> طب معلش .. ممكن أسأل برضه حد من العمال في مشروع المبنى الحكومي ده ؟؟.. 
عشان اكمن بس .. دي وصية المدام إنت عارف ...
* طبعا طبعا ما فيش مشكلة .. بس هو ممنوع للمدنيين الاقتراب من المشروع إلا بإذن ..
بس أنا هاتصل لك بواحد من مهندسين الإشراف يطلع لنا من جوه نكلمه ...
أنا كنت أخذت إذن قبل كده واتعرفت عليه .. اسمه المهندس هيثم ..
وكمان عشان كلهم مشغولين جوا بصب الأساسات ...
------------

(6)

= يعني أخيرا ًيا حايس حلمنا هايتحقق ؟؟.. أخيرا هاقدر أعمل كل اللي عايزاه ؟
وهايبقى معايا كل اللي أتمناه ؟؟؟.. أنا مش مصدقه نفسي ...
>> الصبر شويه بس يا حايسه .. المبلغ اللي دفعته انهارده كان قطمة وسط ..
تقريبا راح سبعين في الميه من راس مالنا .. 
والباقي هايروح بقا في تخليص الرخصة والتشطيب والبضاعات .. 
= إنت مش قلت إنك هاتبدأ تعلن عن تأجير محلات جوه المجمع من دلوقتي ؟؟..
>> أيوه أيوه .. من بكره هاروح لمكتب هندسي .. وهاروح أعمل إعلان في جريدة كبيرة ..
= طيب ... وهايتبقى لينا إحنا كام لمصاريفنا الشخصية لحد ما تبدأ العجلة في الدوران ؟؟..
>> يدوبك .. مبلغ كويس لمدة أربع أو ست شهور ...
= طيب يا حايس .. كنت عايزه أطلب منك طلب .. بس خايفه لتكسفني أو ترفض ..
>> إيه هو يا حبيبتي ...
= هو اعتراف أكتر منه طلب .. أو : قبل ما يبقى طلب ... وأوعدني قبل أما اتكلم :
إنك ما تزعلش مني ولا تغضب ولا تتعصب ..
>> !!!.. قولي يا سيتي .. شوقتيني أعرف هو إيه ... وأوعدك ...
وما تخافيش .. 
المفروض أصلا إن الملحد ما يغضبش ولا يتعصب إلا إذا وقع ضرر (مادي) مباشر عليه :
وإنتي لحد دلوقتي ما ضربتنيش ولا مرة في حياتك ....... هههههه .. قولي ياللا ...
= بص يا حايس ... وأرجوك ما تخدش الموضوع بضحك أو هزار .. أنا هاتكلم جد الجد ..
>> يا سيتي قولي ..
= وتعاهدني إن يكون الحَكم ما بينا ( الإلحاد ) و ( مباديء الإلحاد ) ؟؟؟..
>> طبعا طبعا .. ده شيء أنا أفتخر بيه .. إنتي نسيتي إني اتجوزتك على سنة الإلحاد ورسوله ؟
هههههههههه ...
= افتكر : إنت اللي قلت بنفسك أهوه ... وأرجوك سيب الضحك والهزار بقه على جنب ..
>> خلاص .. شوية جد .. اتفضلي ..
--------

= أنا كنت في مرة في مكتبك يا حايس وإحنا في أمريكا : ولاقيته فيه تراب كده وعايز يتنضف ..
>> مكتبي أنا ؟؟.. غريبة !!.. دانا شباكي علطول مقفول ومشغل التكييف : وأنا اللي بنضفه بنفسي ؟
= المهم يعني يا حايس .. أنا لاقيته عايز يتنضف وخلاص ..!
وبالصدفة البحتة : لاقيت أوراق كشفك في عيادة أمراض الرجال والعقم ..
>> إيه ؟؟!!.. ودي لاقتيها إزاي ؟؟!!.. 
دانا حاططها في وسط ورق كتير في الدرج التالت من المكتب من تحت !! إنتي كنتي بتنضفي الأدراج كمان ؟
= هه ؟؟.. مش فاكرة الصراحة عترت عليهم إزاي .. ممكن تكون إنت كنت بتقرا فيهم ونسيتهم ع المكتب !
ثم مش هيا دي المشكلة يا سيدي .. إنت مش واثق فيا واللا إيه ؟؟!!..
>> هه ؟؟.. لا طبعا واثق فيك ثقة عمياء .. وإنتي عارفه كده كويس .. طب كملي يا سيتي .. وبعدين ؟
= ما كدبش عليك : أنا أخدت منهم صورة من الكوبيار اللي في مكتبك .. وعرضتها على عيادة دكتور كلارك ..
أكيد إنت عارفها .. كان فيه إعلان ليها قريب من مدخل الشارع عندنا هناك ...
>> المهم ؟؟؟ وإيه اللي حصل ؟؟..
= قاللي للأسف : إنك مش ممكن تخلف أبدا ً.. ولا حتى بأطفال الأنابيب أو التلقيح الخارجي ...
لأن مشكلتك زي ما ظهر من الأوراق اللي صورتها : إن ما فيش حيوانات منوية أصلا ً: 
ولا حتى في عينات الخصية اللي اتاخدت منك لحد دلوقتي .. يعني حتى عملية الحقن المجهري مش هاتنفع !
>> بصي يا حايسة .. هيا التحاليل والكشوفات يبان منها كده فعلا ... بس أنا الكلام اللي تقالي :
إنه لسه فيه أمل ومش بالسوداوية اللي إنتي باصالها دي !!!.. وما تنسيش إن العلم كل يوم في جديد ...
= مش نافع يا حايس صدقني .. ومش عايزين نضحك على بعض .. إنت عندك متلازمة كلاينفلتر للأسف ..!
ولو كنا اهتمينا فعلا بالتحاليل قبل الجواز : كنا أكيد عرفنا كده .. بس احنا اللي اتسرعنا واشتريناه بفلوس !
>> يعني إنتي نادمانه يا حايسه على جوازك بيا ؟؟.. هل هو ده معنى كلامك ؟؟..
هل لسه بتفكري في الواد التايه ده بتاع منتدى الملحدين اللي كنتوا بتهظروا مع بعض فيه ؟؟؟..
= يا حايس أرجوك إفهمني .. وتأكد إن سانيو ده إنسان محترم .. وأنا انقطعت علاقتي بيه خالص ..
ورغم إنه لسه بيكتب في المنتدى معانا : إلا أنه لما عرف إني اتجوزتك : خلاص ما بنكلمش بعض ..
فأرجوك سيب موضوعه على جنب .. وركز في الفكرة بتاعتي ...
>> وإيه هيا بقى الفكرة بتاعتك ؟؟..
= احم .. احم ... بنك الحيوانات المنوية في أمريكا ....
>> إيه ؟؟؟؟؟؟؟؟؟؟؟؟؟؟؟؟؟؟!!.. 
أهو ده المستحيل بعينه يا حايسه !!!!.. 
ده يبقى زنا !!.. وجالك قلب تقوليهالي ؟؟؟.. حرام عليكي ...
= اهدا بس يا حايس .. وخلينا نتكلم بالعقل ...
>> أي عقل ده يا حايسه ؟؟.. طب ما عندك فكرة التبني .. اشمعنا الفكرة المهببة دي ؟
= خلاص يا حايس .. مش هانتكلم بالعقل .. خلينا نتكلم بالمباديء الإلحادية زي ما اتفقنا :
والسؤال :
إيه المشكلة إن يتم تخصيبي بحيوانات منوية لراجل لا أعرفه ولا يعرفني ولا شوفته ولا هاشوفه ؟
فين المشكلة هنا بالنسبالك ؟؟.. ولا هو تعنت وخلاص ؟؟..
وطبعا أنا لو عايزه أتبنى حد كنت اتبنيت من زمان .. لكن اللي هاتبناه ده واقضي عمري معاه :
لا هايبقى فيه منك : ولا مني !!!!..
وأنا عايزاه يكون فيه أي حاجه مننا ..!! تخيل كده إنه يبقى فيه من شبهي ؟؟.. هاحس لحد كبير إنه مني !
>> كلام غلط في غلط في غلط .. المهم المشاعر في التربية .. مش الشبه !!!..
كام أب وأم خلفوا : وكانت حياتهم جحيم مع أولادهم !!!.. وكام أب وأم اتبنوا : وكانت حياتهم جنة !!..
= بص يا حايس .. أنا مش عايزه كلام كتير في الموضوع ده .. لأني حسمت أمري ...
إما بنك الحيوانات المنوية ... وإما الطلاق !!!!.. وطبعا نسبتي في مشروع المجمع التجاري منصوصة بالعقد ..
>> نسبتك في المجمع التجاري ؟؟؟؟.. بقه هيا دي كل اللي هماكي لو انفصلنا يا حايسه ؟؟؟..
= للأسف أيوه يا حايس ..!
أنا لما اتجوزتك : اتجوزت واحد ملحد عقلاني ملو هدومه .. مثقف ومتنور مش متخلف ورجعي .. 
وعاهدنا نفسنا عهد إننا نطبق الإلحاد ونعيشه بمبادئه بحذافيره ... صح ؟؟؟..
>> صح ...
= يبقى خلاص .. تقدر تقولي مانع واحد (( من وجهة نظر الإلحاد )) في اللي عايزه أعمله ؟!!..
يكفيني بس إني هاكون مبسوطة .. وما ضرتكش في حاجه ..! نص العمى ولا العمى كله ...
وأنا عايزه أربي طفل يكون فيه حته مني ...
ومش مشكله بعد كده تكون الحته التانيه دي منين .. 
>> بقه كده يا حايسه ؟؟.. ده كلام برضه تقولهولي !!.. ومش هامك الحته التانيه تكون منين !
= الخلاصة يا حايس ... موافق ولا لأ ؟؟؟.. عشان إنت اللي هاتصرف مصاريف الرحلة والعملية ..
>> كمان !!!!..
= هما أسبوعين تقريبا وتلاقيني راجعه .. هاسافر لوحدي عشان تتفرغ إنت لمشروع المجمع ..
وكويس إني ما قولتلكش خليني أكمل سفري لشهر عشان أتفسح شويه هناك ؟؟..
>> حسبي فيكي يا حايسة .. حسبي فيكي ...! بتستغليني عشان بحبك ؟؟..
= حلوه حسبي فيكي دي ... ههههه ...
صدقني يا حايس .. خد الموضوع ببساطة : هاتلاقيه ما فيهوش أي حاجه خالص ..!
يعني لو تطبق الإلحاد بحذافيره فعلا ً: مش هاتلاقي أي مبرر لزعلك .. صح ؟؟..
إنسى بقه وخلينا نفرفش شويه ...

ترررن .. تررررررن .. تررررررررن ..

>> ألو .. وصباح الخير وبركاته .. أيوه يا أم ياسر .. هــه ؟؟.. آه .. طيب ماشي ... تك ..
= مرات أخوك كمال ؟؟؟..
>> أيوه ... وعايزه منك خدمه صغيره معلش ...
= خير ؟؟ أنا بكره المتخلفة المنقبة دي هيا وأخوك ... الاتنين نشاز في العمارة !!!!..
شوف أبوك وأمك في الدور الأرضي : عايشين حياتهم إزاي ..
وإحنا وأخوك سعيد : عايشين حياتنا إزاي .. 
وما فيش ألا أخوك كمال ومراته وعيالهم هما المعقدين !!.. مين اللي ربا أخوك كمال ده ؟
>> ههههههه .. المسجد ..! المهم لاحسن الكلام ياخدنا ..
هيا عايزاكي تطلعي تقفي معاها بس عَمال ما الراجل بتاع الغاز ياخد قراية العداد من المطبخ ..
= ياااااااااااااااااه !!.. 
هيا دي الخدمه الصغيره !!!.. هيا فكره الراجل يعني هايكولها !!!.. ولا هيا مس يونيفيرس ؟؟!!!..
>> يا سيتي ما تعمليلناش مشاكل على حاجات هايفه بقه .. دي مش هاتاخد منك ثواني ...
= المشكلة إنها تاخد على كده !!.. وكل ما راجل ييجيلهم أتفضل بسلامتي أطلعلها كل مرة !!!..
>> لا يا سيتي اطمني .. المشكلة بس إن كمال مسافر انهارده .. ولو موجود في الشغل كان جه ..
الورشة بتاعته قريب من هنا ...
= خلاص يا سيدي .. عشان خاطرك إنت بس ...
أما نشوف المتحجرين دول هايودونا لحد فين ....
-----------

(7)

# اتفضل يا أستاذ حايس .. اتفضل ...
>> معلش على الزيارة المتكررة يا أستاذ جمعة .. بس أنا قلقان ...
فات 3 أسابيع .. ولا حد اهتم ولا اتصل !!.. ومراتي زمانها جايه من السفر ...
وأنا عاملها البحر طحينة زي ما بيقولوا !!!.. أرجوك : 
خليلي الإعلان عن المشروع في مكان أكبر وأوضح .. 
# صدقني يا أستاذ حايس .. ما فيش بعد كده إلا الصفحة الأخيرة في الجريدة :
ويا إما تاخد الصفحة كلها : وده تكلفته كبيرة جدا .. أو تخلي الإعلان في نص الصفحة مثلا ..
هل هو ده اللي إنت عايزه ؟؟؟..
>> طب وإنت رأيك إيه ؟؟.. رأيك الشخصي يعني وخبرتك ؟؟؟..
# بأمانة وما تزعلش ؟؟؟..
>> بأمانة ومش هازعل .. بس ريحني .. أنا مش لاقي أي تفسير .. 
والفلوس عمالة تتسرسب مني : وما فيش أي مقابل لحد دلوقتي !!.. مش عارف فين الخلل ؟
# قوللي بصراحة يا أستاذ حايس .. إنت مين اللي قالك على فكرة المشروع الفاشلة دي ؟؟؟..
>> فاشلة !!!.. يا نهار مش زي بعضه !!.. فاشلة إزاي يا أستاذ جمعة أبوس إيدك ؟؟!!!!!!!..
# يا أستاذ حايس :
المجمع السكني أولا ً: في حته محدوفه جدا ً!!!!.. 
ثانيا ً: الشقق اللي جوه عامله زي علب السردين !!!.. صغيره جدا وسقفها واطي !!!!..
وفوق ده وده : صاحبها مصر على أسعارها العالية : وواثق إنه هاييجي يوم والناس يضطروا ليها !!!..
ده أنا نفسي اللي قاعد هنا في نص البلد سامع عنها وعن أسعارها ومواصفاتها !!!!..
مين ده اللي هايسيب شقه أوسع في أماكن تانية أو أبراج تانيه وبسعر قد السعر :
ويروح يسكن في الزنازين دي ؟؟!!..
يعني لو الراجل مثلا كان عمل مشروعه في نص البلد : كان ممكن مشي حتى بمواصفات الشقق دي ..
أو لو كان رخص في أسعارها : كانت مشيت برضه ممكن ..
إنما أحلامه بصراحه واسعه حبتين ..!!
وأنا مش باقول إن كلامه غلط .. بس عَمال أما يتحقق فعلا ً: مش أقل من تلت أربع سنين !!!!..
واللي زي ده ملياردير ما يعرفش غير الفلوس : حتى ولو هايسكن الناس في قمقم ..
ومش فارق معاه إنه يسيب المجمع السكني كله فاضي كده أي مده !!.. لأنه عنده مشاريع تانيه !
اللي زيه بيستنى لما العمران هو اللي يسحب عليه : بعكس ما انت كنت متخيل :
إنه هو اللي هايسحب العمران لمكانه !!!!!..
>> يخرب بيتك يا طروبش !!!!..
# هــه ؟؟.. أنا طروبش ؟؟!!!!..
>> لا لا .. العفو يا أستاذ جمعه العفو .. 
أنا بشتم الحيوان اللي ضحك عليا ودبسني التدبيسه المهببة دي !!.. دي مصيبه بكل المقاييس ..
آه .. طب سؤال أخير يا أستاذ جمعه أرجوك ...
هل سمعت إن فيه مبنى حكومي بيتبني هناك قريب من المجمع السكني ؟؟.. 
أنا شوفتهم بيصبوا الأساسات بنفسي ..!!
# أيوه على ما أعتقد ... تقريبا ًمحطة تقوية كهرباء كبيرة ...
>> تقوية كهرباء !!!!!!!!!!!.. طب المبنى بتاعها سبع أدوار ؟؟؟!!!..
# سبع أدوار أيه يا أستاذ حايس !!!.. إنت ما شوفتش محطة تقوية كهرباء في حياتك ولا إيه ؟!! 
>> يا نهار مش فايت !!!.. يعني ما فيهاش حتى موظفين !!!!..
# إنت شكلك اتعرضت لعملية تغرير وخداع كبيرة يا أستاذ حايس للأسف !!!..
بس كان فين عقلك ونظرك يا راااجل ؟؟؟.. إنت مش بتقول إنك رحت هناك بنفسك ؟؟؟..
دا أنا عشان كده ما ارضيتش أتكلم معاك أول مرة جت لي فيها هنا ...
إنت كنت بتتكلم بكل ثقة !!!..
>> أنا فعلا انضحك عليا يا أستاذ جمعة !!.. انضحك عليا !!.. تحويشة عمري أنا وزوجتي راحت للأسف !!!..
والكلب اللي ضحك عليا ده : 
ما خلنيش حتى أقرب من محطة تقوية الكهربا وأنا باتكلم مع الكومبارس بتاعه أكيد !!..
طبعا لأني كنت هاقرا يافطة المشروع من على قرب : وإنه محطة تقوية كهربا ومش زي ما كان بيخدعني !
# على العموم يا أستاذ حايس هون عليك .. إنت وشك احمر خالص وكده غلط ...
ارفع راسك من إيديك وما تفكرش في اللي فات ...
أنا ما قلتلكش إن مشروعك ضاع .. أنا بقول بس ممكن تتأخر الثمرة بتاعته والمكسب لسنتين تلاته ..
الصبر الصبر .. وكل شيء يتحسن بإذن الله ...
>> طب الكلب الطروبش اللي ضحك عليا ده : هل أقدر أشتكيه أو يتقبض عليه ؟
# وهل إنت فيه عندك أي دليل عليه ؟؟؟.. أوراق أو أي حاجه تثبت غشه ليك ...؟
>> لا للأسف .. ما اعرفش عنه أي حاجه غير بعض المعلومات الهبله على النت !!!..
وطبعا هاتلاقيه مأمن نفسه من الناحيادي كمان وعامل حسابه ......
أأأأأأأأأأأأخ ..!!
كدب .. في كدب .. في كدب ... ليه كده ..؟؟ ليه المسلمين كده ؟؟؟..
ليه الغش والخداع كده في حياتكو يا مسلمين ؟؟... ليه ؟؟؟..
# طيب وليه التعميم ده بس يا أستاذ حايس ؟؟.. إهدا بس أهدا .. واش عرفك إنه مسلم ؟
إنت مش بتقول إنك ما تعرفش حاجه عنه أصلا ً؟؟؟..
ما يمكن يكون مالوش ملة يا أستاذ حايس ؟؟.. يمكن يكون نصراني ولا ليبرالي ولا ملحد ؟؟؟..
إحنا في زمن ما بقاش له أمان ...
حتى الأخ يا أستاذ حايس : الأخ نفسه :
بقه ممكن يخدع أخوه عشان شوية فلوس ولا شوية منفعه لا راحوا ولا جوم !!..
تخيل ؟؟؟!!..
------------

(8)

^^ تعالى اقعد هنا يا أستاذ .. المكان اللي انت رايحله هناك ده بتاع الستات ..!
>> أوه ..!! معلش .. بقالي سنين ما جتش محطات المترو هنا .. آسف ..
^^ يعني بقالك سنين ما ركبتش المترو ويوم ما تيجي تركبه : تيجي في يوم زي ده ؟!.. 
>> ما هوا عشان اليوم ده واللي حاصل في الشوارع بره : لقيت إن المترو أحسن ..
فركنت عربيتي .. وجيت أقرب محطة ..
^^ هيا طبعا فكرة كويسة فعلا في الظروف اللي بره دي .. بس هنا برضه في مشاكل ..
>> هنا كمان ؟؟!!..
^^ طبعا !!.. شكلك كده مش متابع التليفزيون ولا الأخبار ... على العموم :
ممكن تقعد تستنى معايا المترو .. هو ممكن يتأخر لنص ساعة على الأكتر .. 
>> نص ساعة بحالها ؟؟!!..
^^ ده لو ما حصلش حاجه فوق عطلته أو وقفته .. وربنا يستر .. 
على العموم : هو هنا ءأمن من فوق بكتير ... وأدينا بندردش أهوه مع بعض ...
>> على رأيك .. ما باليد حيلة ....
ابنك ده ؟؟..
^^ آه .. ما شاء الله .. تعالى يا حمودي هنا لحسن تقع تحت عند المترو ..!
>> عنده كام سنة ؟؟
^^ أربعة ونص .. يا واد العب حوالين العمود هنا وما تروحش ناحية المترو عشان زمانه جاي ..
>> خلي بالك منه ...
^^ ..........؟؟
طب قول ربنا يخليهولك .. أو أقول ما شاء الله لا قوة إلا بالله .. ولا أنت نصراني ؟؟..
لو مسلم : المفروض تبرك لما تشوف حاجه كويسه .. دي معلومة ناس كتير ما تعرفهاش للأسف ..
>> قصدك عشان العين يعني والحسد والحاجات دي ؟؟..
^^ أيوه .. طب ما أنت عارف أهوه ...
>> إنت مؤمن بالحاجات دي ؟..
^^ إلا مؤمن بيها !!.. طبعا مؤمن بيها .. الحسد ربنا ذكره في القرآن .. والعين في السنة ..
هو في أصدق من الله ورسوله يا أستاذ ؟؟!!..
>> هممممم .. 
^^ شكلك كده مش مقتنع .. بص يا أستاذ .. إنت عارف ابني محمد ده جه إزاي ؟؟..
>> بالعين والحسد ؟؟؟... ههههه ...
^^ هههههههه .. لا لا طبعا .. أنا هاحكيلك ...
أنا اتجوزت وأنا عندي 33 سنة .. يدوب عمال أما عرفت أكوم نفسي .. قصدي أكون نفسي ..
وبرضه زوجتي كانت كبيرة شوية .. 29 سنة ..
وعدت سنة .. اتنين .. أربعة .. سبعة .. وما فيش خلفة ...
بصراحة ناس كتير دلونا على عيادات كتير متخصصة وعلاج إلخ إلخ ..
ورغم إن كل الكلام ده صح .. والمفروض المسلم ياخد بأسباب العلاج .. إلا إننا رفضنا لسببين ..
>> قصدك رفضت إنت وزوجتك ؟؟..
^^ آه ...
السبب الأول : 
سبب مادي بحت .. وما اكدبش عليك ... لأننا سمعنا إن الطريق ده مكلف .. وخصوصا لو طول ..
وأما السبب التاني : 
فهو إن كل واحد فينا ما حبش يجرح التاني لو كان السبب منه هو .. وكمان خوفنا لا نلاقي السبب :
ما فيهوش أمل بالمرة !!.. فنفقد الدافع كله .. ونفقد إحنا كمان الأمل بالمرة معاه ..!!
فاخترنا طريق الصبر والدعاء والاستغفار ...
>> يا سلااااام !!.. وبكده بقا خلفت علطول ؟؟؟..
^^ لا لسه ....
كانت أمنية حياتي أنا وزوجتي إننا نطلع عمرة مع بعض ...
بس للأسف ما كانش معانا فلوس كتير ... لأننا كنا لسه بنسدد في أقساط الشقة ..
ويريد ربنا إني أتنقل لشغل خاص .. وأوفاجأ إن الراجل صاحبه ربنا يباركله يا رب :
متعود كل سنة يطلع خمسة من الموظفين على حسابه للعمرة !!!.. وطلعت في القرعة !!!..
ولما زوجتي عرفت : قررت تبيع شوية دهب من بتاعها : وتطلع معايا ...
>> خليني أنا أكمل ...
وطبعا روحت الكعبة .. وشربت مية زمزم .. ودعيت ربنا .. وهوب : خلفتوا .. صح ؟
^^ فعلا .. بعدها بشهرين بدأ الحمل ...
>> يا سلاااام .. وعايزني أصدقك يا أستاذ ؟؟.. ده حتى لو حصل : فهو صدفة ..!!
ولا أكثر ولا أقل ... ولأن لو كلامك صح : لكان كل الناس راحت شربت من مية زمزم ..!!!
^^ بص يا عزيزي .. شكلك كده من الجماعة (العقلانيين) إياهم ..
أنا ما بقولش إن كل اللي يشرب من مية زمزم هاتتحقق أمانيه .. دي حاجه راجعة لربنا أولا وأخيرا !
افرض إن ربنا مش كاتب ليا أصلا إني أخلف ؟؟.. افرض هو ده امتحاني أصلا ؟ عندك اعتراض ؟!!!.. 
وقصاد كده ربنا هايجزيني على دعائي حسنات في الدنيا والآخرة .. 
لأن الدعاء نفسه عبادة فيها توحيد الإلتجاء لله والتذلل ليه وحده بالسؤال والتسليم بقضائه والتفويض ..
بس فيه حاجه هنا لازم تعرفها وتاخد بالك منها كويس قوي ..
وهيا إن الدنيا ماشيه بالأسباب .. 
والدعا بتاعنا : وحتى دعا الأب والأم لينا : وحتى شرب مية زمزم : كلها برضه أسباب !!!..
وزيها زي الأدوية .. هل إنت تقدر تقول إن كل أدوية العالم بتشفي كل اللي بياخدها ؟؟..
لا طبعا : إلا لو ربنا رايد الشفا لصاحبها .. وبرضه هو الدعاء كده ومية زمزم ...
واعرف ناس خلفوا بعد 13 سنة !!.. وبعد 5 سنين !!.. وجابوا توائم كمان والله !!!..
ومن غير ما يروحوا عمرة ..! وبعد ما فشل معاهم العلاج كتير ...! 
وزي ما أنت ما تقدرش تقول نسيب الأدوية عشان فلان وفلان أخدها وما اتشافاش :
فبرضه ما نقدرش نقول نسيب الدعاء ونكدب مية زمزم عشان فلان وفلان ما استجبش دعاه !
ده أولا ...
وأما ثانيا : فحتى في عَالم الطب : الدكاترة والناس عارفين تأثير ثقة المريض بالدوا في الشفا !
يعني لو مريض مش واثق بالدوا أصلا ومش مؤمن أو مصدق إنه ممكن يشفيه :
فده بيبقى ليه تأثير على تفاعل جسمه مع الدوا أكيد !!.. فتلاقي اتنين مثلا أخدوا نفس الدوا :
واحد ربنا شافاه .. والتاني لا عشان قلبه وعقله كان رافض الدوا أصلا !!!..
فما بالك بقا لو واحد زيك مثلا مش مؤمن بالحاجات الغيبية دي : وراح شرب مية زمزم ؟؟
أنا عن نفسي : أعتقد إنك لو شربت لوحدك 10 لتر مش هايأثروا فيك !!!..
لأنك مش مؤمن بيهم أصلا ً!!!!.. والله أعلم ..
>> فعلا .. الله أعلم !!!..
بص يا أستاذ أرجوك .. خليني في اللي أنا فيه .. وسيبني أستنا المترو في هدوء ..
أنا عندي مشاكل الدنيا كلها فوق دماغي .. ومش فاضي لكلام المشايخ ده ..
^^ سبحان الله العظيم !!.. كلام مشايخ ؟!!.. صدقني يا أستاذ : أنا عرفت دلوقتي همومك !
همومك مش في مشاكلك .. لأن تأكد إن فيه ناس كتيره عندها مشاكل أضعاف أضعافك ..
همومك هيا في ( طريقة ) علاجك لمشاكلك !!!..
صدقني يا أستاذ : ما أضعف الإنسان وهو بعيد عن ربنا !!.. وما أقواه وهو مع ربنا !!!..
ورغم إن الدنيا هيا دنيا أسباب .. إلا إن ربنا سبحانه هو فوق الأسباب .. وبأيده وحده كل شيء ..
شوف حتى عقم السيدة سارة مرات سيدنا إبراهيم : وعقم مرات سيدنا زكريا : وربنا رزقهم بالولد !
والذكي هوا اللي لما يحتاج خدمة من مدير المدرسة مثلا ً:
ما يروحشي يطلبها من مدرس ولا فراش ولا وكيل !!!!.. وخصوصا والمدير فاتح بابه علطول !
ولله المثل الأعلى ....
فهمت حاجه ؟؟؟..
-----------------

(9)

>> أنا حاسس إن الدنيا كلها اسودت في عنيه يا حايسه !!!..
والمشروع لسه موقوف حاله : وبعد ما حطينا فيه فلوسنا كلها تقريبا !!!..
إيه الحظ النحس ده ؟؟!!.. يا ريتنا ما كنا نزلنا من أمريكا .. يا ريتنا ...
دي شورتك إنتي يا حايسة .. إنتي السبب !.. مش عارف إنتي كنتي ملهوفة قوي كده على مصر ليه ؟
إيش حال لسه حال البلد يضرب يقلب كمان ....
= يعني أنا كنت بشم على ضهر إيدي يا حايس ؟؟.. 
أنا كل تفكيري مادي بحت .. وبحسب مكاسبي بالورقة والقلم ...
المبلغ اللي كان معانا : ما يعملش حاجه ضخمة في أمريكا .. لكن هنا في مصر : وفي الوقت ده بالذات :
يعتبر كنز وثروة .. العيب فيك إنت يا حايس .. إظاهر كل حاجه في إيدك أو من ناحيتك بتكون فاشلة !
>> بقا كده يا حايسه ؟؟.. مش هارد عليكي .. ومش هاستسلم برضه .. وهاتشوفي ..
أكيد فيه فكره تحيي المشروع ده : أو حتى ممكن ألزقه في واحد تاني غيري : زي ما طروبش لزقه فيا !
هاحاول ...!
= هههههه .. برضه بالغش يا حايس ؟؟.. واللا هاتعمل مدونة ليه هو كمان ؟ هههه ..
>> بتهظري يا حايسه ؟؟.. إنتي مش حاسه بيا أبدا .. كل اللي همك بيبي الغفلة ..
البيبي اللي ما نعرفش شكل أبوه ده هايبقى زنجي ولا أمريكي هجين ولا إيه ؟!!!..
يعني افرضي مثلا طلعت ملامحه أسيوية ولا زنجية : هاقول إيه لابويا وأمي وإخواتي ؟!!..
= أبوه أبيض يا سيدي ووسيم .. ههههه .. هما قالولي كده في أمريكا ...!
>> طب بس بس عشان السيرة دي بتنرفزني وبتخليني عايز أقولك حاجات مش ولا بد ...
فعلا : الإلحاد ما فيهوش مشاعر !.. ولو كان فيه : كان هايبقى عندك شوية دم ولا كسوف !
ثم إنتي لحد دلوقتي ما ورتينيش وصولات العملية : ولا وصل الفندق والحاجات دي ؟
= والتفاصيل دي هاتفيدك في إيه يا حايس ؟؟.. أنا رحت وجيت وخلاص انتهينا .. 
وفعلا صرفت السبعين ألف دولار على قد الرحلة بالظبط ...!
طبعا وأنا عيني فيهم بعد أما ضيعت فلوسي معاك يا فالح .. أنا الغلطانه إني وثقت فيك !
>> طب بس بس ...
وبيبي الغفلة ده بقا ولد ولا بنت : ولا لسه ما تعرفيش ؟؟؟..
= هــه ؟؟.. لا لسه ما اعرفش ...
هما علاقتهم بيا انقطعت من بعد ما اتأكدوا من نجاح التلقيح .. بس ما تستعجلش ..
يا خبر النهارده بفلوس : بكره يبقى ببلاش ... ونفسي تتقبل الموضوع ده بنفس وبصدر رحب بقه ..
اعتبره ابنك ولا بنتك يا سيدي وقضي الأمر .. خلاص ؟؟..
>> أما نشوف ....
= المهم إنت بس ما تقرفنيش : وكل شويه تسألني أنا رايحه فين وجايه منين ..
لأن كل مشاويري الجايه بعد كده هاتبقى للعيادة عشان متابعة الحمل وسلامته .. متفقين ؟؟؟..
>> متفقين .. بس مواعيد العيادة بتاعتك غريبة قوي يا حايسة ؟!..
شوية الصبح .. وشوية العصر وقت الغدا ..! وشوية بالليل لحد الساعة واحدة !!!!..
= هــه ؟.. أصل هي العيادة مشغولة علطول ويادوب بالعافية باخد المواعيد دي ...
>> على العموم ... باتمنالك التوفيق طالما ده شيء يسعدك .. 
وكفايه عليا إني باوصلك وخلاص .. ولو عايزاني أقعد معاكي فوق في العيادة ما فيش مانع ..
= تقعد معايا فين يا حايس ؟؟.. إحنا بنبقى مجموعة ستات وبنتكلم مع بعض ..!!
لا .. خليك إنت للتوصيل بس ...
>> خلاص ... بس أبقي طمنيني بأخبار الحمل أول بأول ... يمكن أحاول أحس معاه بالأبوة !
يمكن ....................
-----------------

(10)

>> بريود !!!..
والبريود دي جاتلك منين يا حايسه ؟!!!!!!!!!!!!!!!!!!!!!!!..
لا لا لا ... ده يبقى كتير قوي كده لو كانت العملية فشلت هيا كمان !!!!...
هاتبقى العملية والمشروع ؟!!!.. ليه كده ؟!!.. ليه ؟؟!!.. ليه كل الفشل ده ليه ؟!!!..
= يا حبيبي استنى بس ما تتسرعش .. وخليني أبعت أسأل الدكاترة في أمريكا : أنا معايا إيميلهم ..!
ممكن يكون الدم ده مش دم بريود طبيعي < يخرب بيتك يا سانيو لو طلعت كلاينفلتر إنت كمان ! >
>> لا لا لا .. ما تحاوليش يا حايسه .. أنا منهار .. مش بقولك كل حاجه بتسود في وشي !!..
أنا مش زعلان على البيبي .. يروح في داهيه : ده أصلا كان هايفضل في عينيه طول حياتي ابن زنا !!!..
كان هايفضل ابن راجل تاني غيري وشاركني فيكي .. وده جرح عمري ما هانساه .. 
إنما أنا زعلي كله على السبعين ألف دولار !!.. شقا عمري اللي استحملت البهدله عشانه سنين !
مش ممكن تكون خسارتي بالشكل ده !!!.. ليه نزلتينا من أمريكا يا حايسه ليه !!!..
= اهدا بس يا حايس .. أنا لسه هاروح أتابع العيادة هنا .. يمكن فيه تفسير أو علاج ..
ليه تتوقع الأسوأ بس والتفسير الأوحش قبل وقوعه ؟؟...
>> قبل وقوعه إيه يا حايسه !!!.. إنتي جاتلك البريود أولريدي !!!.. فيه إيه بعد كده ؟!!!..
أرجوكي : إديني إيميل الدكاترة في أمريكا والمركز بتاعهم ده .. إديني كل الوصولات والعَقد ..
أنا هاخرب بيتهم كلهم وهارجع فلوسي منهم أضعاف مضاعفه ..
أنا هارفع عليهم قضية وتعويض كبير .. لأن دي مش أول مرة أسمعهم يغلطوا فيها هناك ..
حتى المتجوزين نفسهم في بنك الحيوانات المنوية المجمدة : 
كانوا ساعات يلقحوا الزوجة غلط : بمني مش زوجها اللي مات أو جاله سرطان !!!..
وأنا شوفت الناس اللي حصلهم كده رفعوا قواضي وكسبوها واتصرفتلهم تعويضات كبيرة ..
إديني البيانات كلها يا حايسه .. إديهالي ...
= هــه !!.. البيانات .. آه .. بس استنى بس يا حايس .. الصبر الصبر .. 
>> فيه إيه يا حايسه ؟؟!!.. إنتي مش عايزاني اشوف أي حاجه تبع الموضوع ده ليه ؟؟..
لا إيميل ولا بيانات ولا اسم حتى المركز ولا اسم البنك نفسه !.. فيه حاجه ولا إيه ؟؟..
= لا لا لا < يا دي المصيبة ! يخرب بيتك يا سانيو ! > .. الموضوع مش كده خالص ..
>> أمال الموضوع إيه ؟؟..
= هــه !!.. الموضوع .. الموضوع إني خليني أنا بس أسأل وأحاول الأول ..
ما تنساش إن رفع قضية أصلا ًفي الحاجات دي هناك في أمريكا هايكلفنا تاني ...
هايكلفنا سفر من جديد لهناك .. وتكاليف فندق وإقامة أكل وشرب وانتقال .. وكمان أتعاب محامي !
فخلينا بس نبذل كل مجهودنا هنا الأول ...
واديني فرصه تانيه .. أكيد في حاجه حصلت غلط عشان ما بزورش العيادة كتير ...!
>> ما بتزوريش العيادة كتير !!!.. 3 مرات في الأسبوع : وما بتزوريش العيادة كتير ؟!!!..
فاضل بقه تبقى زيارتك ليهم كل يوم !!!!.. ولا تقعدي معاهم هناك علطول أحسن ؟!!..
يا خراب بيتك يا حايس !!!.. 
يعني فلوسي راحت من كل ناحيه !!.. وتعبي وشقايا سنين في أمريكا .. وكل اللي استحملته هناك :
ذل .. كدب .. نفاق .. غش .. تعب بدني .. وتعب نفسي .. وضغط عصبي .. رشاوي !!!..
لا .. وفوق ده وده : توصيلي ليكي في عز الزحمة والقرف رايح جاي تلت مرات في الأسبوع :
وكله طلع على فشوش !!!..
أكيد فيه حاجه غلط !!.. أكيد فيه حاجه غلط ...!!
وأنا لازم أعرف إيه هيا ....
-------------------

(11)
<< نهاية المأساة >>

= إنت اتأخرت كده ليه يا حايس ؟؟.. مش عوايدك يعني .. أبوك اتصل بيك مرتين ؟؟..
طراااااااااخ 
( صفعة قوية فجأة على وجهها !! ثم ضرب جنوني من حايس بالأيدي والأقدام ) 
>> بقى تقوليلي بنك الحيوانات المنوية يا (....) ؟؟!!!!.. 
طرااااااخ
( دفعة قوية داخل غرفة النوم الداخلية وغلق الباب بإحكام لمنع فضيحة الصوت )

رتبتي كل حاجه مع عشيقك سانيو من أيام ما كنا في أمريكا .. صح ؟؟؟.. طراااااخ ..
أكيد ما قدرتيش تبعدي عنه ؟؟.. أكيد كنتو بتتقابلو مع بعض من قبل الجواز ...
طب ليه خدعتيني ؟؟.. ليه اتجوزتيني ؟؟.. ولا عشان أنا كنت مسافر لأمريكا ؟!!!..
ما قدرتيش تنسيه ؟؟؟!!.. طراااااااااخ 
لا ....
وعاملالي فيها الملحدة المثقفة المحترمة : وتقولي على مرات أخويا متخلفة !!!!..
بقى هيا المتخلفة يا متخلفة يا (......) ؟؟... طراااااااااااخ 
هيا المتخلفة عشان بتحترم جوزها حتى في غيابه ومش عايزه تختلي براجل غريب ولو لدقايق ؟!!!!..
وانتي يا ملحدة يا (.....) ما فيش عندك أي مانع تروحي للـ (.....) ده 3 مرات في الأسبوع !!.. 
هيا المتخلفة عشان ما حدش بيشوف جمالها غير جوزها :
ومش ماشية تتمخترلي قدام الرجالة والشباب في الشوارع والحفلات والزيارات وفي كل مكان ؟!!..
طرااااااااااااخ 
والله أنا عارف إن فيه مسلمات ممكن يزنوا ويقعوا في الجريمة دي لشهوة ولا نزوة ...
لكنهم على الأقل بيبقوا عارفين إنها غلط ...! وعمرهم ما هايحاولوا يبرروها بالدين !!!.. أبدا !!!..
أما إنتي يا (....) : فأسهل شيء عندك هو تفسيراتك الإلحادية !!!..
إيه يعني أما (حيوان) و(حيوانة) يزنوا مع بعض في أي وقت ؟؟!!.. صح ؟؟؟!!!
طرااااااااااااخ 
لا .. وأنا اللي استاهل .. ما أنا المغفل الـ (.....) ..
أنا اللي كنت بثق فيكي ثقة عميا .. إلهي تتعمي يا رب !!!!..
= إنت بتقول (إلهي) ويا (رب) يا حايس ؟!!!..
>> يا شيخة أنا كفرت بالإلحاد الله ياخدك إنتي وأنا وكل اللي زينا !!!!.. طرااااااااااخ
الله ياخد كل الملحدين إذا كانت شمسهم ما بتنورش إلا مع موت الأخلاق !!!..
أنا بوظت بالإلحاد .. وإنتي بايظه أصلا !!.. وأنا انسلخت من كل معنى جميل !!!..
راحت أيامي الحلوة زمان ...! راحت وسابتني في غفلة طول السنين اللي فاتت دي :
وفي الآخر : ما اتكتبليش إلا اللي ربنا رايدهولي برضه مهما حاولت !!!..
ربنا ورالي قدرته فيا يا حايسه !!.. ورالي قدرته في كل حاجه !!.. ورالي قد إيه أنا ضعيف !!..
وأنا اللي كنت باتحداه !!!.. أو افتكرت للحظات إني ممكن ألغيه من حياتي !!!!..
سنيني وشقا عمري : راح !!!.. 
أخويا : وخدعته بأخس الطرق والكدب والتدليس !!!.. وهو اللي عمره ما أذاني ولكن ساعدني كتير !
والخلفة : حرمني منها ربنا بأبعد شيء كنت ممكن أتخيله !!!..
وحتى مراتي : حلم حياتي اللي كنت بصبر نفسي معاها عشان كنت فاكرها زيي :
طلعت حية وتعبان كبير وأنا مش عارف !!!..
كل حياتي انهارت يا (.....) !!..
تحبي أقولك تفسير جريمتك وندالتك وقذارتك بالمباديء الإلحادية يا حايسة ؟؟؟.. طراااااخ
طبعا إنتي لاقيتي نفسك وقعتي في واحد مغفل زيي : فقررتي تلهفيه ...
فلما راحت فلوسك معايا في المشروع : قررتي تضربي كذا عصفور بحجر واحد ..
وأهو كله في الإلحاد مباح : طالما فيه منفعتك عشان تستمتعي بحياتك قبل أما تموتي صح ؟
طراااااااخ
حيوانات إحنا في الإلحاد والله : ولا فيه مرجعية ولا أخلاق ...!
دلوقتي صدقت كل اللي كان بتكتب عن الملحدين وإنهم أكتر فئات منبوذة في البشر !!..
قررتي تلهفي السبعين ألف دولار يا (....) 
وقررتي تقضيلك أسبوعين تلاتة عسل مع حبيبك سانيو المتخلف زيك طرااااااااخ
وقررتي المغفل المنحوس اللي هو أنا : يتكفل ليكو بتربية ابنكو طول عمره مجانا ؟!!!.. صح ؟
طراااااااااااااااخ
أنا قعدت يومين كاملين أدور على اسمك في كشوفات كل بنوك الحيوانات المنوية في أمريكا : 
ما لاقيتش حاجه !!!..
فقعدت أدور على اسمك في حجوزات أي سفر في الفترة اللي فاتت والمفترض رحتي فيها أمريكا :
لاقيت حجز طيران باسمك لشرم الشيخ يا (....) !!!.. 
وأما المصيبة اللي دمرت قلبي وحياتي :
رحت العيادة اللي كنت بوصلك ليها زي المغفل كل مرة : ما لقيتش اسمك هناك إلا تلت مرات بس !
يعني من عشرات المرات دي : كنتي بتخدعيني إنتي والكلب سانيو بتاعك ؟؟!!!..
كنتي بتخليني أمشي من هناك : وتنزلي إنتي معاه من ورايا يا (....) !!!..
حقيقي والله .. واحد مسلم قالهالي في مرة ...
قاللي مش هاتلاقي ملحد أبدا في الحياة : إلا وبيزداد غباء كل يوم !!!..
وأنا بقيت أغبى حتى من قرد داروين بقرون !!!..
طراااااااااااااااااخ 
( دفعة قوية من حايسة له ليسقط على الأرض : واندفعت هي نحو الباب وفتحته وهربت من الشقة )

>> أأأأأخ .. آآآآآآآآآآه ( تأوه حسرة .. وقد أسند ظهره على الحائط بعدما أغلق باب الشقة ) 
أنا حياتي ادمرت كلها ....
أنا ادمرت ...
كل شيء حلو في حياتي مات انهارده ...
يا ريتني أقدر أرجع الزمن لورا عشر سنين بس .. عشر سنين يا ربي بس ...!
أنا كنت غير كده .. كان حالي غير كده .. كنت بني آدم بيعمل الخير وله هدف في الحياة ..
أنا إيه اللي دخلني الدوامة المهببة دي والإلحاد والزفت والقطران ؟؟!!..
كنت بتضحك على مين يا حايس ساعتها ؟؟؟..
كنت بتضحك على نفسك ولا على الناس ؟؟!!..
ولا كنت عايز تثبت إنك الواد الفهلوي المثقف اللي عرف و (اكتشف) إن الدين أكبر خدعة ؟
هل الإسلام فعلا يا حايس بينك وبين نفسك كان أكبر خدعة ؟؟؟.. ولا النصرانية وكل خرافة تانيه : 
هما اللي ينطبق عليهم الكلام ده : وهما اللي كانوا محتاجين فعلا الناس تفوق منهم ؟!!..
هل فعلا يا حايس كانت شبهاتك عن الإسلام صح ؟؟؟.. واللي اتحججت بيها عشان تسيب الدين ؟
ولا كان كل يوم يتضح ليك إن السبب كان هو جهلك بالدين أصلا والإسلام اللي ما قرتش منه كلمة ؟!
ليه ما فوقتش يا حايس قبل فوات الأوان على عشرات المرات اللي انحرجت فيها وبان فيها جهلك ؟
ليه ما حنيتش لأيام زمان قبل الموقف الأغبر اللي إنت فيه ده دلوقتي ؟؟!!..
حايسه عندها حق ...!
كل اللي عملته فيك : هو حلال ومباح من منظور الإلحاد اللي عاهدت نفسك بنفسك الإلتزام بيه !!!..
صح ؟؟؟..
هل تقدر تلومها في حاجه ؟؟؟..
هل جوازكو الإلحادي كان فيه بند يمنع الخيانة واللا الزنا ؟؟؟..
فاكر لما قالتلك في مرة في أمريكا ممكن تزني : أنا سامحالك بكده !!!..
أكيد الـ (.....) دي كانت بتسخن وتمهد للمصيبة اللي عملتها الله يلعنها !!!..
أكيد كان نفسها أوافق عشان يبقى لا تعايرني ولا أعايرك !!!.. آه يا خسيسة !!!..
مين يآمن لملحد ما عندوش رب ولا حساب ولا عقاب ولا مرجعية ولا أخلاق ؟!!..
مين المغفل زيي مين ؟؟؟..
دلوقتي بس انزاحت الغمامة عن عينيا ...!
دي غمامات .. مش غمامة واحدة ...!
بس متأخر جدا ًللأسف ...

ترررررررررن .. تررررررررررررن .. طك طك طك .. تررررررررن .. تررررن ..
(صوت جرس باب الشقة يضرب متواصل : مع طرقات واهنة ضعيفة على الباب)

>> يادي الفضيحة !... هل يكون حد سمع صويتها أو صريخي وكلامي معاها ؟؟؟..
هل ممكن تكون حايسة رجعت ؟؟.. ندمت ؟؟.. مستحيل .. دي (...) وأنا عارفها ...
أنا ممكن أتوب .. أما هيا فلا ..!! إلهي يا رب تقطع قلبها زي ما قطعت قلبي .. 
وتحطم حياتها هيا والخنزير التاني زي ما حطموا حياتي وخلوني ميت حي ...!
بس صوت الخبط على الباب ضعيف قوي !!.. 
هل ممكن يكون الواد ياسر ابن أخويا كمال ؟؟؟..
ولا الداهية تكون هيا حايسه فعلا : وأغم عليها ولا حاجه ؟؟؟..
أما أبص كده من عين الباب (وقد توقف ضرب الجرس وتوقف الطرق الواهن على الباب) 

ما فيش حد ...!
إظاهر فعلا ًكان الواد ياسر ولا حاجه ومشي لما ما ردتش ...
إنما أنا ليه زعلان قوي كده ؟؟؟..
ليه الطعنة في (شرفي) دي خلتني كده أقرب للموت من الحياة ؟؟؟!!..
والله ده دليل تاني على إني مش حيوان ولا مادة ولا شوية ذرات وبس !!!..
دانا (مشاعري) دلوقتي بتخليني يا إما عايز أقتلها الـ (....) دي : يا إما أقتل نفسي !!!!..
إشمعنا دلوقتي يا حايس اللي اعترفت بالمشاعر (اللامادية) و(الروح) و(النفس) ؟؟!!..
سبحان الله !!!..
هل الإلحاد إلا فن الضحك على النفس والآخرين ؟؟؟!!!..
كل السنين العشرة دي كنت بضحك على نفسي وأنا عارف بس كاتم ؟؟!!!..
أنا كنت ممكن أحترم نفسي لو أنكرت أي شيء في الكون : حتى الأديان كلها :
إلا إني أنكر وجود الخالق بغبائي !!!!..
إيه دخل إنكار الخالق بالتفاهات والشبهات اللي كنت بصطادها دي أو ءألفها بجهلي ؟!!..
عامل زي اللي افتكر إن أبوه ظلمه في حاجه : فقام أنكر إن فيه أب ليه !!!.. والسبب :
إنه لو كان ليه أب : ما كانش هايظلمه !!!!!..
إيه التخلف اللي أنا كنت فيه ده ؟؟!!.. والله الكفر والإلحاد هما غياب وعي وسكر !!..
وأنا اللي بدفع التمن دلوقتي !!!..
كفاية كده يا رب .. مش قادر ...!!
فيه إيه تاني ممكن يحصل ؟؟...
فيه إيه تاني من ذنوبي ممكن يحصل ؟؟..

( صويت يقطع صمت المكان ويقطع أفكار حايس ! صويت جعله ينتفض من الفجأة لقوته :
ولأنه كان خارج باب شقة حايس مباشرة : أي على بعد 2 متر فقط منه ! شعر وكأن قلبه انخلع ) 

>> يا ساتر يا رب .. (يقف ويميل من غير صوت لينظر من عين الباب) ..

""يا حايس .. يا كمال .. أي حد ينجدني يا ولاد .. أخوكم سعيد واقع على الأرض ..
الحقوني يا عالم .... الحقوني ...
----------------

وهنا ....
انهار حايس من جديد ليهبط بظهره مستندا على الحائط ...!
ولكنه لم يستطع تحمل هذه المرة صراخ أمه الذي يدوي في أذنيه على أخيه الأكبر سعيد !!!..
قام حايس بصعوبة مستندا على كل شيء بجواره : ثم مشى مترنحا مستندا ًعلى كل شيء في طريقه :
إلى أن وصل إلى غرفة نومه ليغلقها على نفسه ...!!
ما زال صراخ وعويل أمه يزلزل جسده وكيانه ..
حاول سد أذنيه بيده ..
حاول وضع الوسادة فوق رأسه ... ولكن :
صراخها واسم سعيد يكادان يحرقانه وكأنهما ينصبان من أتون ألف نار ٍونار ..!
اسم سعيد الذي كلما سمعه من فم أمه الثكلى : تخيل صورته أمامه ...!
تخيله وهو يساعده في صغره !.. وهو يشقى من أجله !.. وهو يصرف عليه لسفره !..
اسم سعيد الذي يهوي على قلبه كالمطرقة مع كل صرخة ٍمنها :
ربما بنفس القوة التي هوى بها جسد سعيد على الأرض ميتا متأثرا بذبحته الصدرية :
وبعدما ضرب جرس باب شقته عليه وطرقه بوهن وضعف لآخر مرات حياته !!!..
نعم ..! 
كان هو سعيد مَن كان يبحث عن آخر مساعدة له بين الحياة والموت على باب أخيه الذي خدعه :
فخذله حايس في آخر لحظات حياته !! وكما خذله من قبل عندما ساقه إلى الموت بغير ضمير !!
ومن أين للإلحاد بضمير؟؟؟؟..

الصوت والجلبة بدأت تخفت وتبتعد عن باب شقته ...
ربما ظنوا أنه ليس موجودا ً...
وهو بالفعل في نظر نفسه الآن : غير موجود !!!!..

لعشر سنوات لم يكن يدري كيف يمكن أن يموت الإنسان كمدا ًوحزنا ًويأسا ًمن الحياة !!!..
الآن أيقن من إمكانية حدوث ذلك ...!
أيقن أنه ليس ماكينة بيولوجية خلقتها يد الصدفة وصاغتها العشوائية واصطفاها الانتخاب الطبيعي !
أيقن أنه لم يكن يلتفت للمشاعر الحسنة التي حبا الله تعالى بها البشر :
فأيقظه الله تعالى من غفلته على أسوأ مشاعر يمكن أن يعيشها بشر !!!!..

( مَن أتعس مني الآن ) ؟..

قالها وهو يقوم في غاية الصعوبة ليجلس على كرسي ٍأمام طاولة كتابة صغيرة ...
( خيانة في شرفي ) .. ( ضياع كل مالي ) .. ( هباء الماضي والحاضر ) .. ( قتل أخي ) !

أمسك قلما ًبيده المرتعشة وجسده الذي لم يتوقف عن الاهتزاز منذ أولى صرخات أمه :
ليحاول أن يخط للمرة الأخيرة في حياته : كلمات الوداع ....!
هو نفس القلم ونفس الكرسي ونفس الطاولة التي كان يخطط فيها للحياة .. للكسب .. للإلحاد !
صار عليه الآن أن يستخدمهم ليترك رسالة ًمن ميت ٍإلى أحياء ...!
( لعله ينتفع بها أحد ) ..!

( اللهم أعلم أنك موجود .. ولكني لا أستحق الحياة ..!! ولا أستحق جنتك ) ..!!
( فهذا ما جنيته بنفسي على نفسي ) ..
( أعلم أنك غفور رحيم ) ..
( وأعلم أنني لو تبت لتقبلتني ) ..
( وأعلم أنه في الوقت الذي الانتحار فيه هو نهاية ليست بالغريبة على الإلحاد ) :
( إلا أنك ولآخر لحظة في حياة الإنسان يمكن أن تتقبل توبته : وتدعوه للحياة ! عجيب ) 
( ولكني للأسف ) :
( لا أستحق الحياة ) ..!
( أعلم أن اليأس من رحمتك : كفر ٌبك .. لأني جعلت من ذنوبي شيئا ًأكبر من رحمتك )
( وأعلم أن الانتحار : كفر .. وأعلم أني سأبعث يوم القيامة على ما مت عليه ) ..
( وأعلم أني سأقتل نفسي في جهنم بنفس ما قتلت به نفسي في الدنيا : ولأبد الآبدين ) ..
( ولكني أستحق ) ..!!

توقف حايس للحظات : 
ليحرك بيده المرتعشة الورقة للأمام قليلا : وبعدما ابتلت نهايتها عن آخرها من تحت ذقنه !

( أنا الذي لما كفرت بالله لجهلي :وفي نزوة ٍلم أخبر بها أحد : قتلت حيائي وأخلاقي ) ..!!
( قتلت معاني الخير التي كنت أفعلها في الماضي : فرحا مسرورا مستبشرا ) !!..
( وقعت على صحبة أقذر الناس وأخسهم أخلاقا : وكما يقع الذباب والخنزير على النجاسات ) !
( تزوجت مَن تجسدت فيها مباديء الإلحاد إنسانا : حايسة ) ..
( تزوجت الإلحاد بعينه : والجزاء من جنس العمل ) ..!
( عاهدت نفسي أن أعيش ملحدا ً: فابتلاني الله بمَن ترجم رغبتي أفعالا !! وعهدي أفكارا ) !!
( هذه هي نهاية عشر سنوات من الإلحاد والبعد عن الله : أهديها لكل مَن يعتبر ) !!.. 
( هذا هو ملخص حياتي ومماتي ) :
( عندما صرت ملحدا ً) ...!
----

لم يتم العثور على هذه الورقة إلا بعد ثلاثة أيام كاملة ًمن بعد كتابتها ...
وذلك عندما كسر كمال الباب بحثا عن أخيه وزوجته اللذين اختفت أخبارهما وانغلقت موبايلاتهما :
فلم يجدوا أحدا منهما في الشقة ...!

ولكن ...
هل انتحر حايس فعلا بعدما هرب من البيت ليلا ؟؟.. 
أم تراه تراجع عن الانتحار خوفا من عقاب الله أو طمعا في رحمته ومغفرته رغم كل الذي كان ؟؟
لا أحد يعرف ...!